曼聯球員今年打成點？睇下ESPN季度評分啦！(加霸王倒掛影片！)

到咗季尾，當然係埋單計數出成績表嘅時間啦！今次出成績表嘅係ESPN，為全季的曼聯球員評分！你心目中打得最好又係邊個呢？

第一位：維迪，9分
要贏波，先決條件係唔好失波先！你睇黑池一季攻入55球，曼城都係入60球咋！攻力不可謂不強，但仍要輸19場波降班的原因就係因為失球太多。曼聯有維迪後防真係好穩健，最勁的係佢識得係最有必要嘅時候犯規，而犯規嘅位置就正正唔係禁區之內，佢踩少少界嘅打法令曼聯消弭咗唔少威脅，9分實至名歸！維迪：我第一？
第二位：8.5分的蘭尼、小豆、傑斯
要數的，其實筆者會選長青樹傑斯做今年的最佳！無他，37歲嘅佢好似比起2年前攞職業球員協會年度最佳球員時打得更好，佢嘅經驗令佢成為曼聯陣中大將，單睇佢係歐聯3腳踢走車路士就知佢每一腳含金量有幾高。而且唔好忘記，星仔唔出得時佢要打哂左路；星仔出返佢又要移入中場，真係場場打足！不過最唔開心的，係季尾先爆一單大醜聞，今次呢位威爾斯魔術師真係變咩都救唔返個名…依家最重要嘅係，希望呢單醜聞唔好影響佢對巴塞嘅表現啦！

而另一位令人眼前一亮嘅，當然係小豆靴南迪斯啦！已經被譽為新蘇斯克查、新奧雲嘅小豆，一年之間快高長大，由新仔成長為超級後備殺手，再成長為前鋒線上朗尼仔的拍檔，第一季就貢獻20球入球，單靠天賦打出咁驚人的成績真係唔係簡單！
而第3位拿到8.5分的，就係開始進入成熟期嘅蘭尼！佢今屆終於都打出好的球季，助攻入波都有份，走動同默契都好咗唔少，仲得到曼聯今年的年度最佳球員。不過論效率，佢比起華倫西亞仍差少少，所以人地一復出佢就少咗機會勒…蘭尼你要再努力啲先得呀！(不過成日活係C朗的陰影之下又真係難攪啲…鬼叫你同師兄打法咁似咩)3位得第2的紅魔！
第3位：8分的雲達沙同費迪南
兩位大師兄都係8分！新一代鋼門雲達沙六年來今年係佢打得最好的一季，要數佢的失誤真係好易！因為實在太少！我諗大家都會記得佢對西布朗個球失誤，同FA CUP被曼城攻入的失球…其他？真係無印象！唔知同佢幾似嘅迪基亞又有無驚喜呢？

大師兄費迪南今屆真係傷病纏身，如果唔係佢一定唔止上陣咁少。不過佢同維迪的組合仍然係世界級的！呢幕...應該無得再見了...
其他分數：
7.5分：星仔、華倫西亞
7分：史摩寧、達斯華兄弟
6.5分：安達臣、貝碧托夫、史高斯
6分：艾夫拿、費查、朗尼
5.5分：卡域克、吉遜
5分：奧沙
4.5分：奧雲
4分：伊雲斯
3.5分：布朗
3分：加利仔
而包尾嘅係…得2分，但身價仲貴過小豆嘅…碧比
你心目中又點評分呢？

其實朗尼可以高分啲！我地重溫一下佢的霸王倒掛啦！http://www.youtube.com/watch?v=bO7y-Lv-PUE

來源：ESPN及youtube