衛報：車曼大戰五大發現！

大戰賽果非常宜人，我諗大家都睇唔少香港人的評論！咁外國的你又有無興趣呢？英國衛報的Daniel Taylor就寫咗一段幾有趣的文章，同大家一齊分享下！係車曼大戰中，佢發現咗5件事：

一：維迪驚托利斯？你out咗勒！
故仔係咁嘅…托利斯話：「兩年前我當維迪係lulu，幫利記以四比一打低曼聯，勁呢！」自此之後，人人都話維迪怕咗托利斯勒…不過時過境遷，現在托利斯係球場上已經行行企企咗12個鍾無波入，而維迪亦好成功咁封殺咗王子唔俾佢開齋，所以大家唔好再話維迪驚托利斯勒！Daniel Taylor仲覺得維迪可以同托利斯交換波衫，然後將佢掛係屋企，就好似武松打完虎，留返塊皮留個紀念咁話！維迪：嘻嘻，你唔夠我勁！(設計對白)
二：杜奧巴慘成委屈小狗
雖然車仔一早出魔獸都未必降到魔，但無庸置疑杜奧巴下半場一出，紅魔後防就多咗好多麻煩！安察洛堤盲目用啞火王子，將魔獸投閒置散，成件事可能一開始就錯咗…堂堂魔獸含冤受屈變咗慘慘小狗，都幾令人心傷…杜奧巴：俾條路行下好wor哥仔！王子：叫我王子，唔係哥仔，我好貴ga！(設計對白)
三：費迪南影帝就無你份，鐵衛你就當之無愧！
其實由9分鐘開始費迪南已經開始苦埋口面，無他，已經傷傷地勒…不過佢用盡吃奶的力扮無事，又扮哂嘢唔望曼聯的軍醫，企圖暪足全場…係就係成功咗，打足哂90分鐘，而費爵亦表示佢只係撞親下，但…成日傷都唔係好得wor…要知道佢加維迪真係最強鐵衛組合，佢健健康康打足一季紅魔就穩陣好多啦！
四：林伯是時候轉型勒
鐵人林伯出哂名係典型「box to-box player」，即係走上走落，兩邊禁區都見到佢，不過…已經是幾年前的事了。33歲都要人走上走落？咪玩啦！你睇傑斯，以前佢爆落底線無人追到佢，依家佢爆落底線隨時追唔到個波…所以傑斯咪轉型打技術加極有效的二傳 / 助攻囉！林伯都係時候諗下，唔可以再用鐵人式打法勒！
五：買粒豆好過買個王子！
條數好易計，花師奶都識：一粒豆600萬磅，上陣37場入18粒；一個王子5000萬磅，入…0粒。所以今季而言，呢粒豆真係好超值，Daniel Taylor甚至認為以錢用得其所的角度而言，小豆已經可以媲美簡東拿、蘇斯克查、舒米高等曼聯傳奇！我唔貴ga~~真係唔係好貴~~
來源: 英國衛報