4線連戰!摩連奴的幸福頭痕!

曼聯專區 於 26/01/2017 發表 收藏文章
密密麻麻賽程令摩連奴非常頭痛,原因係4線作戰的曼聯好有可能在季尾面臨超魔鬼賽程!而第一個禍首,竟然係同聯賽盃有關。利物浦聯賽盃被淘汰,對曼聯嚟講當然係亦悲亦喜。悲係咩?大決戰於溫布萊大敗對手大出一口氣,呢個當然係最美妙的戰果;不過依家對實力弱少少嘅修咸頓,對於奪標有多幾分把握,亦未嘗唔係好事。當然都要睇睇今晚大戰侯城點啦!2球優勢在手,曼聯要晉級決賽對聖徒,理論上應該唔難!

只係問題嚟喇,聯賽盃的決賽會在2月26日舉行,而當日正正就係曼市打吡嘅日子,換言之曼聯入決賽的話,呢場大戰就要改期!咁會改邊日呢?曼聯依家面對4戰線,老老實實要補賽真係唔知幾時有時間。摩連奴就話,下半季對曼聯而言真係好艱辛:「如果我哋一步步都做到所想,其實情況會令我哋非常困難。如果,如果我哋真係打入聯賽盃決賽,曼市打吡就要讓路。我肯肯定佢哋會精心挑選一個日子補賽令我哋唔好過。唔好忘記我哋仲有不停站的歐霸,要知歐聯得16強,歐霸係有32強。晉級意味有更多嘅比賽要打。」

老老實實,情況一啲都唔樂觀,因為當年3冠王嗰時曼聯一年打咗63場比賽,如果今年咁順利的話,單單係聯賽盃、足總盃、歐霸悉數晉級,曼聯最少已經要打66場比賽,仲未計之後啲半準決賽呀、決賽之類。足總盃仲有個好恐怖的賽制,就係和波要重賽,有可能令比賽場次更多。摩連奴已經作最壞打算:「我office有個日曆mark好哂可能要打嘅比賽,嗰個圖真係慘不忍睹…有啲隊伍好舒服,周末打一場波輕輕鬆鬆,唞2日,操3到5日,又有足夠時間去釐清戰術、細列注意事項,分別可以好大。」

嗯….點解聽落好似有骨咁嘅?無歐聯、無歐霸、無聯賽盃,得足總盃同聯賽2條戰線…算,都係唔講其他人…如果萬一真係連環晉級,曼聯又有無足夠兵力去應付呢?最大問題當然係伊巴同卡域克啦,總唔可以要兩老一星期連戰3場…到時唔好話無機會畀球員,小豬、楊格、梳爾都好有可能要擔大旗!唯一好處係咩?就係我哋有多幾場波睇囉!
標籤: 摩連奴  

留言


請按此登錄後留言。未成為會員? 立即註冊
  • Yong Yuhan 於 26/01/2017 評論 NO. 1

    都咪话如果有球员受伤

  • somewhere 於 26/01/2017 評論 NO. 2

    車仔今年咁舒服都係全靠摩連奴 到時實要邀請佢一齊上台捧杯

  • 李奧152 於 26/01/2017 評論 NO. 3

    唔講以為踢緊歐聯!魔佬講野點都拉埋其他隊,佢太有自信喇,江華話over左就唔係好事!希望獌到尾乜都無就皆大歡喜!睇個勢都似!夠鬼人踢!

  • swans 於 27/01/2017 評論 NO. 4

    傻傻地,我相信車仔寧願有得踼歐洲賽lo

  • lurk 於 27/01/2017 評論 NO. 5

    大把人佢唔用啫,昨晚又幾乎full team咁出,有乜辦法唔累

  • 李奧152 於 29/01/2017 評論 NO. 6

    話人地輕鬆!獌下年仲輕鬆,準備無歐洲賽打!

  • Ringo418 於 29/01/2017 評論 NO. 7

    一敝人一"‘请!。😈😐

快捷鍵:←
快捷鍵:→