雲高爾：大手買人對球員不尊重 精選

早前英媒廣泛報導格拉沙家族為咗重建曼聯王國，唔單止之前俾嘅1億5300萬鎊，仲有機會加碼1億5000萬鎊，喺迪馬利亞、法卡奧等人完善前場攻力之後，誓要連中後防都嚟個大翻新，曉姆斯、史杜特文、丹尼爾、高甸全部係目標，甚至洛賓、馬高列奧斯都要收入隊中。哇，好一隊足球經理遊戲的超黃金陣容…

聽到呢個猶如第二條Euro Star咁龐大嘅工程，雲高爾就表示…好嘔心：「講到數字咁大？真係令人好嘔心。我唔認為活華特會講呢啲，我自己都唔會講呢啲。話我哋會大手買人係對在隊球員不尊重，我唔會講呢種說話。我要好好同陣中球員一同努力，我要尊重陣中嘅選擇。我信任我嘅球員。」都話架啦，吹都唔好吹咁大嘛…一兩個新球員都仲話合情合理，係唔係？
不過要買人，其實真係唔容易架！雲高爾講到，買人已經唔係講錢，而係講「名」：「已經唔係錢嘅問題…只要係曼聯問價，大家都會叫高啲、再叫高啲啲！而我哋都要俾，因為我哋係曼聯。」其實呢個都係英格蘭球壇的大勢，就連車仔、曼城、利物浦、阿仙奴要買人，其實都要出好多錢，有時真係overpay好多先得…睇下家下英超第三位嘅修咸頓就知啦，賣哂啲星走之後，佢哋今季有成9300萬鎊收入呀！唔係佢哋同大球會開大口，又點會有咁多錢呢？
咁...真係要信馬達喇！