雙紅會焦點:新盾迎新矛!馬迪爾惡鬥包列斯達!

曼聯專區 於 02/10/2015 發表 收藏文章
阿仙奴對曼聯的雙紅會,早早就已經無哂火爆味,反而似捉棋多啲,技術性擊倒對手已經成為「新雙紅會」的特色。而喺即將來到嘅雙紅會,更加係兩軍陣中新希望的直接技術對碰!

曼聯方面,當然係講新貴馬迪爾啦,雖然佢呢一兩場都無波入,不過助攻又好、殺入敵陣亦好,都表現出唔似19歲仔嘅能力同膽色,更可怕嘅係佢開季至今嘅數據都非常驚人。3場英超佢都打出水準,而且已經畀大家一個好鮮明嘅印象:快速、盤球過人技術高超、喜歡扭過對手守將攻門,好簡單但絕對唔易防守,因為佢變速能力高、令人難以捉摸之餘,更有極快嘅跑動速度,平均每小時33.2公里嘅段速令史卡迪爾、卡保奧、荷西方迪、華基爾雲迪積克、奧沙都無佢符。只係3場比賽啫,佢已經10次試過想扭過後衛,當中有7次成功,平均29分鐘就擊穿一次對方的防線,是英超前10名的「突破者」。不過今次呢一位小將要突破,可能就有啲難度喇。

因為佢今仗對手基比爾包列斯達(Gabriel Paulista)係英超第5快嘅後衛,最高速試過平均每小時34.1公里,數字上已經擊敗馬迪爾。而包列斯達仲係一位好穩陣嘅守將,今季甚至未試過畀對手盤扭突破過,無錯,係一次都無。大家可以幻想一下,佢曾經面對嘅係史達寧、盧卡古等等攻擊悍將,論身型速度都喺英超名列頭幾位,不過都難以用個人能力突破基比爾包列斯達的防守,以突襲、變速搵食嘅馬迪爾,今次真係面對一位好敵手,又或者可以話係第一塊試金石。

曼聯最強的新矛迎向阿仙奴最強的新盾,呢個對碰絕對值得期待,不過對於馬迪爾呢位細包列斯達5年嘅小朋友嚟講,佢都幾有機會落下風…唔講球員,單講結果的話,曼聯家下的最強尖刀能否擊敗包列斯達成疑,當然代表呢場波要贏唔易啦!不過其實馬迪爾仲有一招殺著:助攻。周中歐聯大家都見到佢做埋翼鋒嘅工作,落底傳中造就隊友,效果仲一啲都唔差!所以,如果佢真係畀包列斯達凍結,都仲有機會拉空球場空間,造就隊友入波。呢個會係馬達?定係朗尼呢?當然,最好梗係佢漂漂亮亮「拆盾」,連包列斯達都完勝埋、做埋雙紅會贏波功臣啦!

如果喜歡我們的文章,請即分享到︰

留言


請按此登錄後留言。未成為會員? 立即註冊
  • Aandy Lleung 於 02/10/2015 評論 NO. 1

    19歲,仲有好多進步空間…………勁

  • rickytct 於 02/10/2015 評論 NO. 2

    史達寧身形,我笑而不語

  • 揾邊位 於 03/10/2015 評論 NO. 3

    d獌未踢已經打曬j

  • Harvey Tai 於 03/10/2015 評論 NO. 4

    阿記win

  • lkw8855 於 03/10/2015 評論 NO. 5

    等睇雲膠出梅毒

快捷鍵:←
快捷鍵:→