返嚟喇！梳爾復操！ 精選

曾經有傳媒講過，今年曼聯成績麻麻嘅原因唔多唔少因為左閘梳爾長期缺陣，因為佢正正就係喺狀態提升緊嘅時候遭到斷腳重創。唔經唔覺，對燕豪芬時受傷嘅梳爾已經休息咗7個月，當時仲有唔少人估佢要抖足一年先可以復出。不過根據馬達的消息，呢位年輕小將已經重回訓練場了！

馬達喺自己社交網上放上一張梳爾嘅相，寫住：「梳爾剛剛出咗去草地跑動！回來的時間越來越近了。」雖然領隊雲高爾上星期講過，佢今季應該唔會畀機會梳爾上陣架喇，始終佢都缺
席咁耐，狀態同體能都未必應付到英超強度咁高嘅比賽，不過歐國盃呢？佢都仲可能有機會，鶴臣已經講明5月12日英軍先會交歐國盃名單，如果之前梳爾可以證明自己應付到，未必無機會隨大軍出戰。

今次梳爾嘅康復其實算係幾快，同樣都係小腿雙骨折，前阿仙奴前鋒達施華用咗近300日先回到賽場，藍斯都要252日。(詳見梳爾可能缺席的比賽...)今次梳爾7個月左右即係200幾日就可以再接受訓練，返綠茵場嘅速度有可能比達施華、藍斯都要快！筆者咁諗啦，今季要再見到佢可能有啲難度，始終曼聯都追緊歐聯席位，雲帥未必敢試佢，不過真心想喺歐國盃見到佢！