衛報：曼聯仍可衛冕的六大原因 精選

筆者自己就對曼聯衛冕不太抱有希望，始終曼城的對手唔強，只要輕輕小勝個1:0已經可以奪走英超冠軍。然而英國衛報就列出了6大原因，指曼聯絕對有機會在今晚反超前藍月亮。係邊6大呢？

第一：曼城對賽QPR往績差
QPR今季攞嘅分比曼城少49分，大家都會明白這是一場實力懸殊的比賽。然而，在過去9場曼城在緬因球場主場迎戰昆士柏流浪只係贏過2次，不過就從未在聯合球場迎戰QPR。如果只看數據，曼城要贏QPR就要出啲力，情況就好似布力般總係可以反壓曼聯一樣。壓住你！
第二：紅魔總是黑貓煞星
紅魔對黑貓的賽事往往可以擊敗對手，過去的8次作客之中曼聯贏咗6次，而計計埋埋8場新特蘭只係入得4粒。呢個往績對曼聯的球員心理應該有好大幫助！第三：領隊對碰：曼城對曉士無啖好食
唔講唔知，原來以作客身份去到聯合球場，曉士從未輸過俾曼城！而數據上更加可怕，曉士過去10場對曼城只敗一場，帶領富咸同布力般4次打敗曼城、和波5場。上年就係佢帶領富咸1:1逼和曼城！當時藍月亮已經有巴神在陣，入波就係佢。
文帥，今晚再讚曉士都未遲！因為佢要贏你喇！
第四：領隊對碰：奧尼爾見紅魔就怕怕
新特蘭的領隊奧尼爾真係「見魔愁」，過去8場對紅魔只係和過一場，其他全敗…咁多場波奧尼爾失波21球，唔知今場可唔可以再創新高，紅魔數個9:0？

第五：聯賽魔詛：曼城英超煞科黯然多
過去的7年，曼城的英超煞科日都係唔開心多，只係贏過2場波。而當中，又以2008年敗於米杜士堡的賽事最令人印象深刻，因為曼城輸足8:1…今年會唔會更唔開心？就係呢場輸8:1喇曼城
第六：勝利女神的微笑：曼聯煞科日多歡騰
過去的四年，每一年的英超煞科日都係勝出賽事嘅，而2007年雖然煞科日輸波，不過嗰年曼聯一早已經封王。單以煞科日而言，曼聯是勢不可擋。
求求你啦...

不過踢波呢啲嘢，都係一場計一場嘅，過去數據係點其實都係得個睇字；紀錄，都係等人破嘅…無論今晚比賽的成敗如何，曼聯今季的表現都已經唔差架喇！好似爵爺所講，拋離第3的阿記成19分，仲想點？紅魔今晚唔好理冠軍定咩喇，打場好波俾球迷睇，好好收個靚尾啦！今晚來多次就好喇...雖然難啲

來源：衛報