萬人迷：曼城永遠唔會有曼聯咁強大！

早前爵爺話曼聯係打敗巴塞之前先要打敗最近的對手曼城先，不過紅魔的一代7號仔萬人迷碧咸就唔係咁睇喇！佢接受衛報訪問時指出，即使曼城一直成長緊，但佢地永遠都唔會有曼聯咁成功同強大！

佢係咁講嘅：「無容置疑，曼城的強大在於資金。佢地有財力不斷引入球員，咁樣確係幫到球會唔少。不過一個成功的球會並唔係有好球員就夠，仲要好多嘢配合。係咩？其中一樣就係team spirit團隊精神！一班球員要長時間係一齊先可以建立默契同信任，如果一眾曼城球員留得夠耐就會成為好大威脅，不過呢個無人可以保證，如果佢地一直買新人呢？好似車路士咁，阿巴莫域治初到貴境確係勝出了兩屆聯賽冠軍，不過僅此而已。」舊年碧咸帶埋仔仔去睇「曼市打比」，睇下羅密歐帶住曼聯冷帽，就知碧咸仍然心繫曼聯!!!


對於泰維斯，佢亦有自己的想法(定係…諷刺？？)：「泰維斯係一個好好的球員，無咗佢一定會令人好失望。不過唔怕嘅，真係留唔到佢曼城都無問題，橫豎佢地都有大把錢，可以買返國際級的球員返來替泰維斯。」
係碧咸的十年紅魔生涯之中，佢都對過幾次曼城架！提到對戰曼城的往績，佢就咁講喇：「次次對佢地時紅魔都係如日中天，曼聯氣勢強到要贏咩比賽就一定贏到，所以對親都係以勝利作結。你可以幻想到嗰時做曼聯球員真係幾開心！」
呢一幕唔止兩年前見到，晌碧咸效力嘅時間，經常都出現曼聯晌打比戰勝出嘅一幕...

「而帶領我地贏咁多嘅費格遜真係居功至偉架！即使大家認為曼聯已經接近完美，爵爺都會引入新的球員，讓合適的人物在合適的時間出現，令曼聯可以在加入新血時亦能一直保持球員的默契。呢個就係爵爺咁強的原因！我見唔到佢有退下來的一日，對我而言佢亦好似爸爸一樣，教我好多嘢。佢係世上最好的領隊，亦必定係曼聯的傳奇。」

「…我一直都係曼聯的粉絲，所以我認為即使曼城擁有再多的頂級球員，佢都一定唔可能成為另一隊曼聯。」
雖然曾經發生過「飛boot」事件，但碧咸一直對費sir呢位宗師有萬分敬意...

後記：筆者感覺呢個訪問都幾惹火！不過萬人迷都幾啱，雖然車仔係成功過兩年，不過係留唔到好的人物，影響最大的莫過於留唔到摩連奴！依家的曼城都係一樣，留唔住泰維斯，又要傳好多壞消息如降艾迪巴約去打U18組等，氣氛都係唔係咁好。相反，就算係離隊消息，都係老將要退休，或者係效力已經好耐的奧沙同布朗想要新挑戰而轉會，以氣氛而言確係勝出一籌！呢個團體精神主導的球隊會唔會就係你支持佢的原因呢？
http://img705.imageshack.us/img705/8049/20484922.gif一直都好想重返英超踢波嘅碧咸，被問及點解去年一月唔加盟熱刺時，佢就話：「因因唔想晌聯賽代表其他隊鬥對曼聯，所以選擇留晌洛杉磯銀河。」

來源：衛報