菲臘仔處女下海講波收445個投訴

曼聯專區 於 04/07/2014 發表 收藏文章
講波其實真係一門學問,唔係話識踢波嘅一定講得好,好似某台某位自恃係明星足球隊一員嘅過氣無里頭主持,筆者真係一見佢個樣就熄電視…而另外一位行內出哂名嘅足球評述,亦出名講波亂吹水、無內容、即席作,亦係筆者敬而遠之、寧願睇英文台嘅一員…

不過喺佢口中無速度、唔夠快、跑得慢嘅曼聯傳奇右閘加利佬已經成功轉型為講波佬,而佢嘅細佬菲臘仔亦剛剛處女下海幫BBC做評述,點知都係惹嚟好大反響,佢第一場講嘅英格蘭對意大利,最後收咗445個投訴,甚至有人叫佢「去死啦!」真係陰公豬…究竟佢犯了甚麼錯?其實只係一個初哥必犯的問題:太死板同太單調!

其實佢背後好勤力,練咗兩個月先敢「開咪」,不過都係避唔過大家對佢嘅指責。佢自己都上過社交網站,都知道啲人鬧得好勁,亦立即知道自己問題喺邊。講波其實都係6分資料4分個人意見,講到足球你又點會夠佢熟,所以問題不在嗰6分的資料上,而係佢可以俾到咩額外嘢。於是佢向唔同人求經,當然第一個就搵哥哥幫下手啦!最後佢都搵到自己嘅長處,就係好多球員其實佢都有同佢哋比賽過,間唔中就可以講下之前比賽時的有趣事,好似佢哋有咩小習慣呀,或者有無小動作可以捉到佢哋路之類,所以之後佢嘅表現都叫做好返啲,大家都無鬧咁多喇!當然啦,都要BBC繼續信佢,菲臘仔先可以再講多幾場世界盃嘅!

而佢都有提到至今有邊幾個時候最難忘,好似巴西作為東道主第一場比賽,佢就睇到好感動。而雲佩斯、占士洛迪古斯的美妙入波佢都好喜歡,不過佢最鍾意都係前隊友卡希爾攻入的掛網入波!菲臘仔講到佢同卡希爾好好朋友,日日都傾計,見到佢入到個世界波真係好開心咁話。佢始終都係新仔,入到8強大戰佢都無機會再講落去喇,不過之後有無機會呢?就真係要等下喇!而筆者自己聽完,就認為佢比香港某啲講波佬都講得好囉…
http://www.youtube.com/watch?v=IHmjpcOC-t4都唔係好差啫...
英格蘭賽後菲臘仔的twitter都回應一下自己嘅「劣評」
加油呀講波佬菲臘仔!

如果喜歡我們的文章,請即分享到︰

標籤: 菲臘尼維利  

留言


請按此登錄後留言。未成為會員? 立即註冊
  • leglessbird 於 04/07/2014 評論 NO. 1

    通常虧佬自卑心作祟 先會亂咁認叻

快捷鍵:←
快捷鍵:→