菲爾鍾斯：莫耶斯領軍時氣氛仲差

唔經唔覺，曼聯已經連輸3場波，歐聯出局，聯賽跌出前4，雲高爾壓力一啲都唔細，加上外界盛傳摩連奴會入主曼聯，紅魔當局已經密談準備請雲高爾食無情雞，未來曼聯主帥一職嘅去向，真係令大家拭目以待，之不過隊內球員又唔係唔撐雲帥，起碼菲爾鍾斯就肯為佢作公開支持，事關佢話莫耶斯教嗰時，氣氛仲差!

「我唔可以話依家士氣最低落，莫耶斯教嗰時好不幸地仲差。當時我地成日都踢唔出好波，雖然依家曼聯連輸咗3場，都唔可以話今季打好波，之不過比賽都要繼續，要做嘅就係團結起嚟。」

之後佢又繼續表明隊友打得唔好，係球員責任：「輸波一定係球員嘅責任，絕對係無另一個解釋。領隊揀人出去打場波，球員就應該要喺場上表現佢最好一面，喺場上可能打得好，又有可能打得唔好或者入唔到波，但一切一切球員上下都要表現得團結一致，我哋就有有責任要去咁做，無其他選擇。球員表現好唔係為邊個去做，因為大家都知呢個係球員責任，領隊已經做晒佢可以做嘅事。」

「球員係唔係支持雲高爾? 呢個根本喺更衣室嚟講唔係一個問題，各隊友都好專注為領隊、球迷表現得更好。諾域治場波的確令人好失望，我哋要做嘅只有繼續向前看、努力啲，接受批評同團結起嚟，只有自己先可以幫到自己，我哋下場對史篤城有機會逆轉，雖然好難打，之不過都要好好備戰，力求勝利。」
睇完菲爾鍾斯成篇文，我想到嘅就只有摩連奴被炒之前，車仔班球員都曾經講過差唔多類似內容嘅說話。