莫耶斯：朗尼一季要入30球 唔洗再打中場 精選

曼聯上周六對水晶宮嘅聯賽，雖然朗尼晌頭上嘅傷口仲未好番，之不過佢戴上頭套為紅魔搏命，而佢本人晌比賽中仲表現出好好嘅狀態，下半場81分鐘仲憑一記自由球，射入今季聯賽第一球，就咁睇領隊莫耶斯得意俾朗尼呢一場亮相，重拾狀態之餘，亦為周中對利華古遜以及下輪聯賽曼城，作出準備，令朗尼可以晌緊接兩場波交出好表現。

而莫耶斯日前仲不忘同朗尼打氣，仲承諾朗尼日後晌曼聯只會出任前鋒，「唔止係依家，日後朗尼亦只會晌前鋒位置上出現，我承諾佢唔會再擔任中場角色。朗尼現在已重拾自信，他目前正處於一個非常好嘅身體狀態，此前只不過因為受傷而要缺席一部分比賽。」

曼聯近兩戰對車路士同水晶宮嘅比賽，其實朗尼都被安排打後一格，晌雲佩斯之後，雖然有媒體認為朗尼更喜歡單箭頭角色，不過事實上朗尼晌打後一格嘅10號位上，確實發揮到更大作用。只要有一個健康嘅朗尼，加上一個高效率嘅雲佩斯，就會成為曼聯今季進攻最有效嘅武器，而呢一點莫耶斯亦非常清楚，「我哋隊入面有朗尼同雲佩斯在陣，每個人都希望兩人可以建立到默契，並且攻入更多入球，同樣韋碧克同查維亞靴南迪斯亦有好多機會，同時韋碧克晌季初段表現的確不錯。」

去季由於朗尼同費sir非常不滿，加上有一定程度嘅傷病困擾，朗尼只為曼聯攻入16個球，所以今季莫耶斯除咗承諾俾朗尼打前鋒嘅同時，佢亦不忘幫朗尼定下今季為曼聯入30球嘅目標，並稱朗尼亦同時為自己達咗個差唔多嘅錦標，「朗尼嘅能力毫無疑問可以入好多波，去年佢晌入球數據唔太好睇，但為咗令球隊取得成功，我哋必須擁有一季可攻入20個球左右嘅球員，我對朗尼和雲佩斯都十分期待，並且希望佢哋可以做到。朗尼同雲佩斯晌上輪聯賽成功入波，對我哋嚟講係一個非常好嘅開始。」

除朗尼外，今季已晌聯賽入咗3球嘅雲佩斯，亦展望本季入球數字可以過30球，同時亦認為自己晌今季可以幫助球隊更進一步，尤其晌歐冠方面。另外，雲佩斯仲同曼聯有3年合約，但佢已一早表明晌3年合約滿後仍想繼續留效，留效晌最高水平聯賽到比賽。