福仔跌入「唔上唔落」大危機?

曼聯專區 於 26/07/2018 發表 收藏文章
世界盃有人得到世界嘅關注,有人繼續寂寂無聞咁生活。就有如英軍的拉舒福特,係就係打過一兩場爭氣波,但作為次選、作為大後備,記得佢嘅人其實真係唔多。數數手指,福仔今個足球盛事只係上陣過211分鐘,5次後備身份入替,鎂光燈點都唔似會照喺佢身上。

諗下都知點解,有卡尼在陣福仔唔會係第一人選,而修夫基重用史達寧嘅戰術之下,亦令福仔上陣機會大減。呢個情況喺曼聯都出現,盧卡古無傷無病的話一定係正選之列;而攻擊球員仲有山齊士「擋在途中」,上位機會真係少之又少。作為國家隊成員無得揀國籍,咁作為球會球員總有得考慮下前途?依家福仔嘅能力,打後備真係浪費得交關,但正選又無佢份,爭取唔到一隊經驗其實即係減慢咗福仔嘅成長,如此一來對球員、對球會都未必係一件好事。咁你估福仔走唔走呢?

作為曼聯球迷,作為摩連奴,其實都唔想再放走一位有潛質嘅球員,一來買球員一定唔會平;二來福仔嘅潛力絕對可以令佢成為世界級嘅前鋒,與其要在市場上追逐,倒不如好好培育福仔。只係上陣時間有限呢個問題,點都要有解決方法。而關鍵人物,好可能就係普巴。法國世界盃之旅已經證明咗普巴在442陣式入面雙中場位置打得好舒服,可以連繫進攻防守、控制節奏,如果本人OK摩帥又肯,轉打雙前鋒對福仔上陣機會有正面作用,因為佢可以同盧卡古組成攻堅組合,一個步大力雄、一個入楔時機準確,對突破對手防線而言其實係兩大利器。而呢個打法亦可以將山齊士移入擅長嘅左翼位置,發揮更多攻擊板斧。但萬一摩帥沿用單箭頭?福仔繼續邊沿化,會唔會成為下一個贊奴沙、馬捷達?

問心嗰句,唔係福仔堅持要走的話,摩帥應該真係死都唔賣佢走,呢個都幾肯定。只係要點先可以畀到空間佢繼續成長?咩陣式先可以平衡成績同埋「未來需要」?再加上馬迪爾去留問題、隊中各人嘅平衡、買人嘅藍圖全部環環相扣,今次真係要睇摩連奴點樣拆局,搵出最好方式喇!

標籤: 拉舒福特  

留言


請按此登錄後留言。未成為會員? 立即註冊
  • ray947994 於 26/07/2018 評論 NO. 1

    其實想問下樓主褔仔應該走去邊先啱佢呢

  • Liew Wen Feiy 於 26/07/2018 評論 NO. 2

    最好留在英超,最坏应该是皇马

快捷鍵:←
快捷鍵:→