祖記體育總監馬羅塔：睇咩呀？唔賣！ 精選

莫耶斯早前組織咗睇樓團嘅球員版「睇人團」，唔單止一眾助教去哂睇波，佢自己都去咗祖記睇波，令人忍唔住認為佢想買馬治斯奧、普巴、派路等等祖記兵。不過你有你睇，我有我打，祖記體育總監馬羅塔就表明，無論你幾有興趣、睇幾多次都好，我都唔賣！
唔賣呀
佢咁講：「馬治斯奧？佢無問題呀，青年軍到依家都仲喺祖記打緊，佢有幾鍾意祖雲達斯大家有眼睇啦！你話佢最近跌watt，想離隊搵新挑戰？老實講，季季都打得辛苦，個個球員都有低潮架啦。一切安好，有心，佢唔會離隊。」

「派路份約？上星期佢先同我講佢喺祖記好開心，無問題嘅。我成日同佢傾計架，二月啦，我哋二月就會解決合約嘅問題，下季睇祖記你仍然會見到派路囉。」

「普巴？開門見山啦，我哋唔想賣噃，咩人問我哋都唔賣。講完。」
唔賣咯！
講到咁，即係叫曼聯唔好諗啦！不過咁噃，今時今日，叫曼聯賣人其實都係無人收架噃，無他，好多曼聯想賣走嘅人同買家好難傾得埋，主要原因係佢哋去到曼聯時薪金都升咗唔少，轉會費亦高咗，即使打個折，都無咩球隊買得起。試諗諗，喺曼聯攞緊七萬鎊一星期嘅球員，有幾多肯減薪一半、只為打多啲比賽而轉去其他球會？所以就算曼聯肯「賤賣」，用undisclosed transfer fee(不公布轉會費) 呢招掩飾自己「賤賣」過到關，最後球員同其他球會傾合約呢關都好難過。

所以去到呢到，曼聯喺轉會市場上面對的情況有幾嚴峻，睇怕都唔難理解…無辦法啦，艾活華、莫耶斯，你哋要努力呀…
聽唔到聽唔到...馬羅塔你講咩？我咁受歡迎嘅咩？