球員買賣「友」得傾！

依家球會都幾「人道」，無論買人賣人唔少都會考慮埋球員的意願。咁其實都合理，始終上到場搏殺都係球員，佢哋好朋友啲、關係好啲，比賽時都支援多啲。大家上季有眼睇，伊巴同埋普巴場內場外關係都好，喺場上有化學反應，表現都好啲。

而呢個情況喺盧卡古同普巴身上都一樣見到，臨加盟前2人喺美國一齊操練、一齊打籃球，就知佢哋幾好朋友。而盧卡古自己都講：「普巴係我嘅好朋友，佢仲係我好鄰居！我哋真係日日都見面，所以佢有同我分享佢嘅生活。老老實實佢去咗曼聯真係啟發咗我。我知有一日曼聯想要我加盟，我唔會拒絕。」
而朋友，對於曼聯嘅其他球員嚟講可能代表更多。靴里拉、馬達、迪基亞幾個都係amigo，大家同聲同氣，成日一齊玩之餘，仲會互相影響。靴里拉最近就決意要不惜一切咁留低迪基亞：「又講呢啲可能好悶，不過我諗法無變過。如果睇哂成季，可以為球隊『得分』嘅龍門世上真係無幾多個，而迪基亞就係其中之一。有佢陪我係唔同啲，所以我會盡我所能令佢留低。」就連馬達都話，佢好有信心迪基亞會留在曼聯咁話。

不過話又講返轉頭，有時真係唔可以照顧哂所有人嘅意願，大家都係狂牛成員，靴里拉、馬達對於莫拉達的傳聞都好興奮，甚至已經認定佢係隊友之一，只係唔啱價之餘，莫拉達又無咩英超經驗，為咗球隊唯有接受盧卡古啦……未嚟嘅就由佢啦，作為曼迷，我哋都好希望馬達、靴里拉「拉」得實迪基亞嘅，係唔係？

https://media.giphy.com/media/YyMZ2Dp2kQGKk/giphy.gif