「獅王」伊巴操已復!

曼聯專區 於 01/06/2017 發表 收藏文章
之前先講過伊巴「骨格精奇」,連醫護人員都嚇一嚇,對腳睇落一啲都唔似打咗廿年波!而更為驚人嘅一幕剛剛出現,因為佢已經練返波!伊巴啱啱放咗條片上網,入面睇到佢赤腳企喺草地,左右腳連環剔波,仲要間中原地小跑幾下,邊似35?邊似重創完?你話佢仲有無貨交,駛唔駛提早掛靴?你話呢?佢句caption仲霸氣:「獅子嘅康復進度同人類係唔同嘅。」「獅王」伊巴,你係得嘅!

至於佢下季去邊,有人話佢會離隊,有人話會掛靴,咁呢個問題唔問佢,都應該問下經理人拉奧拿,佢咁講:「留唔留在曼聯?佢會呀!佢想留喺英國,佢想留喺頂級聯賽比賽,如果佢認為自己仲係曼聯的重要資產,梗係會留隊。當然,佢都可以係其他隊伍嘅重要資產,只不過呢一刻當然要尊重曼聯會方,同佢哋傾傾,滿足各方的需要同願望。」

如果曼聯唔同佢續會點?拉奧拿話,唔愁無球隊要伊巴:「其實好多球會都有offer同埋想法,我哋會好好計量一下先。伊巴在曼聯過咗好多美妙時光,所以球會同我都會好好睇下未來會點。現時最重要,就係伊巴快啲好返。」

正常嚟講,球員韌帶嚴重受傷,最少都要休息半年到9個月左右,加上佢年紀唔細,唔少外媒都估計伊巴最少新年左右先可以復出。但係你睇佢依家已經行得走得,做到啲輕鬆嘅復康運動,真係話唔定佢異於常人,開季無耐就好返哂、上得陣都唔定!至於留唔留喺曼聯呢?其實佢都開到口話想留隊,咁你話呢?

按此睇片


如果喜歡我們的文章,請即分享到︰

標籤: 伊巴  

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 01/06/2017 評論 NO. 1

    痴線 咁快操練得 係咪人類嚟

  • 若藍
    若藍 於 01/06/2017 評論 NO. 2

    老土啲都係果句,有啲嘢係有錢都買唔到架,就係經驗,前面幾個後生仔跟佢學法,肯定將來會好有用,而且佢哋肯學,伊巴一定肯教!

快捷鍵:←
快捷鍵:→