爵爺呼籲球迷：雙紅會要乖啲！ 精選

今個星期就係FA Cup對賽利物浦嘅賽事喇！次次雙紅會火藥味都唔弱，今次對陣將會更重！事關艾夫拿同蘇亞雷斯的種族歧視事件已經挑起不少曼聯迷的不滿，再加上同樣係FA Cup，2006年時兩軍對陣時不少曼聯球迷稱遭到利記球迷的不公對待，今次為防止出大事，當地警方已經嚴陣以待！新年流流，當然要以和為貴啦！所以爵爺都特登出咗封溫馨提示俾球迷，請佢哋注意下，忍耐忍耐！

佢喺信入面咁寫：「我寫呢封信係想提大家記得乖乖哋，同晏菲路球場的員工好好合作！為咗可以入場睇波，唔少球迷已經乖咗好多，令我哋今次去睇FA Cup可以獲分配到更多嘅坐位。而為咗保障大家往後喺晏菲路球場睇波嘅機會，我希望大家可以繼續守規矩，包括：

買咩位就坐定定，唔好周圍走
唔好阻塞通道、行人道
尊重晏菲路球場的員工
乖乖守球場規矩

足總盃係球屆大事，每一仗都好好睇，再加上雙紅會戲碼就更加吸引！所以各位球迷嘅支持同合作對球隊好重要架！不過大家記住去晏菲路時集中注意力喺球隊的比賽之上，正面、有力咁支持球隊晉級！」大家乖乖哋呀！

其實以前兩隊比賽時球迷常有不愉快事情發生，呢兩年情況已經好咗，大家都克制咗好多，希望往後都會更好啦！不過睇返場比賽，雖然利物浦賽程緊密，聯賽盃對曼城時出盡力先可以力保晉級，可能體力狀態未必處於巔峰，不過曼聯仍然傷兵滿營，長抖的維迪、費查、基華利，加上新傷的楊格、蘭尼，而傳媒亦估計奧雲同里奧都未能上陣。朗尼對阿仙奴時亦有微傷，惟一的好消息只得鍾斯的傷勢比想像中輕，或許可以上陣…利物浦疲陣迎戰曼聯的殘陣，今仗勝負實在未可預料。要知道最新消息，大家記得留意曼聯專區的報導喇！大家唔好咁意氣之爭，贏波就得喇！