法卡奧原來有英籍血統？ 精選

法卡奧轉會嚟到曼聯之後，外國傳媒就有好多關於佢嘅報導，當中包括大家對於曼聯簽入法卡奧有咩評價，其後就係法卡奧本人好希望可以季尾後永久轉會曼聯，而日前英國《每日郵報》又有最新有關法卡奧嘅消息報導，就係呢名哥倫比亞「老虎」嘅曾祖父，原來嚟自約克郡，即係英國人。

英國《每日郵報》日前同法卡奧父親做咗個訪問，當中重點講及法卡奧嘅身世，佢就講到明對於自己流有英籍血統感到自豪，「我非常驕傲，我嘅身體裡流著英格蘭血液，我嘅祖父係英格蘭人，佢亦都係一個體育人。」第二次世界大戰前，1932年，法卡奧曾祖父就舉家遷往去到哥倫比亞。

由於曾祖父係英格蘭人嘅緣故，法卡奧父親晌佢嗰仔好細個嘅時候就為佢申請英國護照，但未能如願，「當時法卡奧只係得13歲，我帶住佢去到英國使館，認為申請英國護照可以幫到佢日後轉戰歐洲球壇，可惜最終申請被拒絕。」不過好彩法卡奧最終都可以轉戰歐洲地方踢波，此事對佢影響唔係咁大……

法卡奧父親踢後衛出身，曾晌哥倫比亞及委內瑞拉等地方效力，當然轉戰任何地方都將兒子帶晌身邊，令佢從小就得到父親教導足球技術，但原來小時侯法卡奧嘅經歷，對佢現時足球之路都有影響，「晌哥倫比亞時，嗰到啲球場遍地石頭，我好記得當法卡奧返到屋企時，由於成日晌場上跌倒，或者踢波時被石頭整親，佢總係流緊血咁返屋企。不過法卡奧當時流完血後，唔太理會下，又返番去嗰到踢波。」佢爸爸就認為呢方面嘅經歷，令佢晌職業生涯上面戰幾次重大受傷，起了好大幫肋。

至於法卡奧本人日前就晌社交網路Instagram上發佈一張嬌妻彈奏鋼琴嘅照片，讓人羨慕不已。晌相入面，法卡奧妻子身穿白裙，坐晌白色鋼琴前，看著遠方嘅攝影機，並動力彈琴，臉上露出一幅幸福笑容。而據佢妻子晌網站上介紹，原來佢19歲時晌教堂見到法卡奧後，兩人就一見鐘情兼且閃婚，雖然佢跟隨丈夫晌過好多唔同城市居住，但就從未中斷過對音樂嘅學習。