沙夏守得雲開！雲帥：我會試用佢 精選

在雲高爾的麾下，好多嘢都同上年有啲唔同。就好似韋費特沙夏喺莫耶斯領軍之時真係無啖好食，無正選打之餘又要被「發配邊疆」，不過依家佢嘅日子終於都…有重見光明嘅一日啫，得唔得，都仲要睇下佢「得唔得」嘅！

雲帥打咗兩場熱身賽，style就係人人有份永不落空，不過偏偏就係無咗沙夏份，點解呢？唔通佢做唔到雲帥所想？唔係唔係，雲帥解釋佢之所以唔用沙夏，係因為個陣太唔平衡喇！(好似講咗好多次噃呢句…)有幾唔平衡先？佢咁講：「曼聯陣中有太多球員可以勝任前鋒，真係好多。我一早就講咗，我哋個陣容有啲唔平衡，我可以放六個前鋒入去個陣入面！所以呢，下次我應該會用沙夏俾個機會佢，因為佢好努力，做到所有我嘅要求同指示，所以無問題，我會試用佢。」
唔好話佢啦，除咗雲佩斯、朗尼、韋碧克之外，雲帥甚至用過蘭尼、楊格做前鋒，所以話好多人都可以打前鋒，真係唔係得個講字！沙夏大家都認為係翼的材料，今日雲帥同大家講佢都可以打前鋒，你又點睇？不過大家唔好睇佢出得少、又好似囂囂哋，其實佢係爵爺最後一個為曼聯買入的球員，如果佢可以打出身價，唔多唔少都證實咗爵爺眼光獨到架！所以，大家都係等佢表演啦！
佢都係獅子仔！
佢外借俾卡迪夫時都有啲功課交架