歐聯預告:爛熔熔後防 等住不戰而降?

曼聯專區 於 31/03/2014 發表 收藏文章
決戰「宇宙仁」的比賽明晚展開,不過未開打陣容已經爛熔熔,full team都已經唔夠砌,呢個情況可以點算?

先講後面,拉菲爾在上場對維拉時半場退下火線,惹來受傷疑雲。莫帥就指,拉菲爾確實有傷,不過要好好咁check下先知咩事。而拉菲爾本人就話自己無問題,只係大腿肌肉有啲緊,換出係為安全起見。咁即係點呢?出唔出得其實真係未知之數、五十五十架咋。不過就算係出得,大家都唔會唔記得,2010年時紅魔原本以3:1領先拜仁,總比分多一球,原本保持比數就可以晉級。點知呢個時候拉菲爾領紅、洛賓就攻入多一球,送咗拜仁去下一輪比賽。佢本人就咁講:「我永遠都唔會忘記嗰晚。上半場我打得好好,不過最後被趕出場,我真係上咗一堂。代價,係曼聯成隊。」講就係咁講,不過最近比賽時你啲毛手毛腳一啲都唔少噃…

另一方面,左閘就一定無艾夫拿架喇,因為佢要停賽。「替工」畢特拿呢排都有上陣,佢就話:「對韋斯咸同維拉的比賽我都表現幾好。周二嘅比賽對我而言係偉大嘅挑戰,我有必要去證明自己。我有信心可以抵抗洛賓,雖然我無特登研究佢嘅打法,亦無同佢對過陣,不過我有睇佢嘅比賽影片,多多少少已經知道點去防守佢。」單係睇下片就話自己ok無問題,信唔信得過架?

史摩寧同伊雲斯已經係曼聯陣中所餘無幾的中堅人選,不過好不幸,二人都未必可以上陣。所以計計埋埋,條後防線可能得返右面嘅鍾斯、左面畢特拿,同中間里奧加維迪…呢條防線嘅速度同強度究竟頂唔頂得住「進擊的宇宙人」?各位看官,請拭目以待…
標籤: 拉菲爾  畢特拿  

留言


請按此登錄後留言。未成為會員? 立即註冊
    快捷鍵:←
    快捷鍵:→