東尼菲夫醉駕停牌18個月

小紅魔東尼菲夫19歲仔就揸住架Range Rover周圍去，本已經唔係好安全，仲要酒後駕駛，認真唔乖！事件中佢部車差啲撞入人哋間屋，好彩得車入面前座乘客受輕傷，不過架車呢…當然就爛哂啦！
架車爛哂啦....
英國的醉酒駕駛上限為每 100毫升呼氣中酒精含量不得超過 35 微克，而東尼菲夫的呼氣中含量達62微克，多成倍咁滯，咁梗係出事啦。惟一令人無咁嬲嘅係佢唔係去浦飲酒，而係前一晚同屋企人聯誼時飲咗好多，就算瞓醒啲酒都散唔哂，以為自己得先去揸車。所以大家都要引以為鑑喇！而因為東尼菲夫肯去上堂改善駕駛態度，所以18個月的停牌可望減少4個月。不過同時佢都被罰錢800英磅，希望佢受到教訓啦！
汲取教訓，唔好自毀前程呀，話晒你都攞過最佳年青球員獎，相信費SIR有心培養你....
小知識：香港的醉駕比英國嚴，上限為每 100毫升呼氣中酒精含量不得超過 22 微克，最高可被判處罰款港幣25,000元及監禁3年。而血液量含酒精、或尿液量含酒精，都可以成為判罰的證據架！