曼聯 對 紐卡素賽後語 朗尼費查齊聲:返嚟嘅感覺太好喇!!!

曼聯專區 於 27/09/2012 發表 收藏文章
曼聯噚晚主場紐卡素出戰聯賽盃第三圈賽事,第一焦點係費SIR好識做,俾費查以隊長身份亮相,另外今場波佢又大派年青球員上陣,重點當然係全條防線由年青球員擔任,能夠成功贏到同級球隊紐卡素,大家都好滿意。

費SIR:
「呢個賽果好滿意,一來呢個係英超球隊對碰,二來佢哋體力上更比曼聯好,但球隊都能打得出漂亮足球,保持風格,沈著應戰。球隊係值得贏波嘅一方,能夠贏到紐卡素而晉級係非常好嘅賽果。」

講到個別球員喇,費SIR就話:「朗尼同費查表現都無得頂。我哋一早已預期朗尼踢到下半場尾段會體力不繼,但對於一個月無踢過正式賽事嚟講,表現已經好好,費查亦都一樣,10個月之後首次正選上陣兼打足全場,尾段亦有疲態,但整場表現不俗。」
入波功臣安達臣同基華利又點呢?? 「對安達臣同基華利嘅表現就更加滿意,佢哋兩個入波都係高難度入球,基華利晌主場取得處子入球,對佢意義重大。」

咁四個後生仔組成嘅新後防又點睇呢?? 「施斯同艾美奧比都係好有質素嘅前鋒,好難MARK佢哋,雖然失咗一球,但我覺得佢哋已經做得好好,今場波嘅目的係要贏波,一班年青球員上做到喇,下場佢哋亦會繼續有機會亮相。」
朗尼:
「距離我上次落場比賽,已經有成一個月咁耐喇,好開心可以重返球場踢波,呢場波對我嚟講係一個好開始,希望以後可以有更多上陣機會。雖然休戰幾周後復出嘅第一場波一定有某方面嘅困難,但有得落場比賽已經好好,希望上陣對自己狀態有益喇。」

講到基華利喇,「費SIR半場時唔係好滿意聰明仔表現呀,因為佢上半場有個黃金機會錯失咗,但及後下半場出嚟佢又入返球靚波,仲要係處子入波,兩位入波功臣表現的確好好。」
費查:
「最重要嘅事係球隊贏波,好開心可以重返賽場,今次係我第一次晌曼聯帶上隊長臂章,感覺好開心,雖然晌國家隊都試過以隊長身份帶領球隊,之但係今次可以話夢寐以求嘅事,以隊長身份復出,仲贏埋波,的確好開心。球隊今場波打得好好,球隊中場以鑽石陣迎戰,朗尼打後一格任進攻中場,以佢經驗用波、分波俾左右邊,表現唔錯,雖然上半場雖然錯失咗唔少入球機會,亦晌領先2:0被追回一球,令球隊尾段有危機,但後防晌迎戰高波上做出好好防守,令我哋可以贏波而回。」

今場波費查出任防守中場,以老大哥身份帶住兩位中堅新兵米高堅尼同禾頓,「米高堅尼同禾成場波都同我交流,對住兩個高質素前鋒,佢哋表現好好呀喇,對年青球員嚟講,有機會為一隊上陣並表現出色,絕對係一件好事,表現出佢哋已有能力為球隊而戰,為未來做好準備。」
標籤: 曼聯  紐卡素  

留言


請按此登錄後留言。未成為會員? 立即註冊
    快捷鍵:←
    快捷鍵:→