曼聯 對 布拉加 賽後語

曼聯專區 於 24/10/2012 發表 收藏文章
曼聯昨晚晌先落後兩球下,再追番三球,成功晌主場全取3分,暫時以3戰3勝9分晌小組排第一,之但係後防早段失波問題再一次暴露出嚟,如果唔係前線把握得到,今場波又大有機會失分而回,賽後費SIR當然大讚今場波入兩球嘅小豆喇,仲話佢嘅表現令佢揀人好頭痛。
小豆今場波入兩球...

費SIR:
小豆嘅表現令到我好頭痛,令我依家開始要再思考一下人選問題,佢、朗尼、雲佩斯同韋碧克狀態都咁好,令到我下場波都唔知派邊個落場好。小豆不斷追求進步,對比賽又充滿熱情,訓練時亦十分落力,一上場入波率就好高。反勝嗰一球波,雖然卡華利出球波出得好好,之但係都要有小豆晌對方後衛後面走位上前先入到波,佢嘅走位的確係一流。」
小豆走位的確係一流...

讚完小豆,費SIR當然又要講講後防問題喇,「我哋今季晌主場嘅表現就係咁,一定係先失波,之後後上博全取3分,成功贏波而回,絕對要多得前線一班球員嘅表現。今季失球數字咁高,絕對值得關注,之但係前線球員表現的確係非常出色,佢哋製造到多個入球機會,一直保持住動力同高速。相信無咩人晌球隊落後2:0時會估到我哋會反勝,特別係晌歐聯戰線,要後上贏波而回係非常困難,但好開心今場波球員做得到。」

至於對於外界表示今場波早段失兩球,係因為費SIR將卡域克放晌中堅,以及出畢特拿代替艾夫拿,費SIR對呢個批評一啲都唔贊成:「我認為將里奧同艾夫拿免戰係正確決定,只要睇番下我咃嘅賽程,周日對車路士,下周中又對車路士,及後又要對阿仙奴,以里奧佢哋依個年紀,的確需要休息,我哋依家有維迪、菲爾鐘斯同史摩寧仲養傷緊,於是我先將卡域克放晌中堅位,雖然呢個唔係最好選擇,但佢表現得好好,今場第一個失波我覺得都唔關佢事。」

小豆:
「我好明白今場波對球隊好重要,但我哋開局開得好差,好早就晌主場失咗兩球波,但好開心我哋可以反勝3球,原本今場波我有得連中三元,但一切都無所謂,因為今場波最重要係3分,結果做到了,依家係時候要專心周日對車路士場波,事關嗰場波對我哋都好重要。

被問到係咪藉呢場波向費SIR證明實力,佢又話:「當然唔係喇,我成日都講我晌曼聯踢得好開心,我今季一開始已為比賽準備就緒,只要費SIR俾機會我,我就會盡我所能做得最好,有波入當然係好,就算我無波入,球隊表現好都可以。

被問到鐘意用4-4-2定鑽石陣,小豆亦話:「邊個陣最好當然由費SIR決定喇,作為一個球員,只要場上表現好,以及可以發揮到費SIR賽前對你嘅要求就得,唔需要理會自己出任邊一個位置。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→