曼聯爭標路途 – 硬仗連連

雖然曼聯依家仲晌榜首，但連輸俾車路士同利物浦，爭標路途出現暗湧…晌度就同大家分析下曼聯，兼其他爭標份子嘅餘下賽程…

第30週：曼聯 對 保頓
保頓現時40分排第七，今季力爭歐霸席位，但球隊今季作客只係贏得2場，以及對上嗰7場作客賽事全敗，曼聯睇嚟大有機會繼贏曼城之後，重回勝軌。
其他爭標份子：
熱刺 對 韋斯咸、車路士 對 曼城、西布朗 對 阿仙奴
第31週：韋斯咸 對 曼聯
17位嘅韋斯咸要力爭分數護級，而槌仔幫晌1月注入新兵後，表現穩步上揚，搶咗唔少分，佢哋嘅主場亦有取分保證，先後贏過利物浦同史篤城，仲晌聯賽盃以4-0贏過曼聯。但此仗如無意外曼聯助攻王蘭尼應該可以傷癒復出，曼聯攻力應該有所提升，應可一報聯賽盃輸波之仇。
其他爭標份子：
阿仙奴 對 布力般流浪、曼城 對 新特蘭、史篤城 對 車路士、熱刺 對 韋根

第32週：曼聯 對 富咸
曼聯近呢幾年對住11位富咸，一啲都唔易打，但對手今年作客只係贏過一場，只要小心啲佢哋啱啱傷癒嘅前鋒安德魯莊遜，曼聯應有機會晌主場之利，打贏對手。其他爭標份子：
黑池 對 阿仙奴、利物浦 對 曼城、車路士 對 韋根、熱刺 對 史篤城

第33週：紐卡素 對 曼聯
9位嘅紐卡素今季表現難以預測，一時就打得漂亮，正如4-4主場賽和阿仙奴，但又可以俾對手大炒，如作客輸俾保頓5-1，睇嚟曼聯呢場作客比賽，一定要打醒十二分精神。
該週更有另外一場”雙紅會” 阿仙奴對利物浦，唔知利記又會唔會好似上年對車仔咁「擬似」放水呢？
其他爭標份子：
阿仙奴 對 利物浦、西布朗 對 車路士、曼城 對 熱刺

第34週：曼聯 對 愛華頓
第10位嘅愛華頓現時有37分，仍有機會爭歐霸席位，但稍一差池，亦有可能跌入降班旋渦，加上由莫耶斯帶領嘅愛華頓，韌力十足，曼聯雖有主場之利，但亦有暗湧。其他爭標份子：
熱刺 對 阿仙奴、車路士 對 韋斯咸、布力般流浪 對 曼城

第35週：阿仙奴 對 曼聯
呢場絕對係爭標關鍵戰，曼聯近2次作客阿仙奴，都贏波而回，而且最近6次都不敗而回，紀錄上佔盡上風，絕對有力取分回奧脫福。
其他爭標份子：
車路士 對 熱刺、曼城 對 韋斯咸

第36週：曼聯 對 車路士
呢個賽程同3月頭嘅賽程一樣，都係硬仗，先對完阿仙奴，後對車路士，係球隊另一場關鍵之戰，睇返作客車仔一戰，球證判決令到曼聯上上下下都好不滿，呢一團火，係時候要返番去主場爆發出嚟，誓要贏番對手！
其他爭標份子：熱刺 對 黑池、愛華頓 對 曼城、史篤城 對 阿仙奴

第37週：布力般流浪 對 曼聯
魔鬼賽程後，曼聯參與佢哋今季最後一場嘅作客賽事，上年佢哋亦係臨緊季尾作客布力般，只係賽和0-0，失咗2分，簡接令佢哋失咗個聯賽冠軍(1分之差輸咗俾車仔)，睇嚟今次要醒醒定定，唔好再俾歷史重演!
其他爭標份子：
阿仙奴 對 阿士東維拉、車路士 對 紐卡素、曼城 對 史篤城、利物浦 對 熱刺

第38週：曼聯 對 黑池
依家就好難推斷賽季最後一場爭標形勢會變成點，但各隊入面，只有曼聯同熱刺有主場之利，而由賀奴維帶領嘅黑池，表現時好時壞，作客亦曾經贏過韋根4-0、贏新特蘭1-0、贏紐卡素2-0，但都試過0-4輸俾同級嘅狼隊，絕對係難以揣測，曼聯不能掉以輕心。其他爭標份子：
熱刺 對 伯明翰、保頓 對 曼城、愛華頓 對 車路士、富咸 對 阿仙奴