曼聯歐聯戰前三兩事

曼聯專區 於 11/09/2017 發表 收藏文章
對史篤城和波唔多唔少都令曼聯球迷有啲唔開心,不過時間唔等人,比賽都係要繼續,尤其係重要嘅歐聯戰真係返嚟喇!明晚凌晨0245曼聯就會對陣巴素利,展開歐聯小組賽事!而講起歐聯,當然有好多嘢可以講啦!

首先畀少少數字大家睇睇先!最驚嚇嘅當然莫過於可以放25個人嘅大軍名單,曼聯只係數咗24個人,仲要呢個名單入面無福仔份!點解有位都唔要佢?大家放心,呢個只係善用歐聯賽制嘅決定,因為歐聯大軍名單係分A、B,名單A可以落25個人,要有2個門將同埋不少於8個本土球員;而名單B呢就係「小將」名單,只要1996年1月1日之後出世,而且17歲前留隊2年以上嘅球員就出現喺呢到。名單B係唔需要提早呈請,比賽前一日呢個dealine之前交名就OK!所以,福仔唔出現喺A名單唔代表無得出,大家放心!

不過摩帥都講過,因為有球員停賽關係,今次對巴素利中堅由史摩寧同埋連迪路夫伙拍上陣。連迪路夫打季前熱身表現麻麻,而史摩寧就無咩上陣時間畀佢搵返球感,老老實實真係有啲擔心曼聯嘅後防。連奧雲都話,佢睇曼聯後防4人,無一個值得稱上「世界級」,單係好球員上陣歐聯真係未必足夠咁話。而最令人擔心,好可能係左閘嘅問題。摩帥今季輪用白蘭特同達美安,老老實實成果都唔係幾顯著。達美安防守上可圈可點,但助攻方面就真係弱項,佢嘅出波、斬波好少可幫到隊友進攻,與右路華倫西亞始於有段距離。唔知今場波梳爾會唔會被委以重任,繼而搶埋聯賽正選位呢?

而前鋒方面,自上場比賽之後亦有唔少名宿擔心盧卡古未遇上真正考驗,正如恩斯就提出小組賽階段面對巴素利、賓菲加等球隊其實考驗唔到盧卡古,只係遇上巴塞皇馬呢啲皇者級數,盧卡古先係面對真正挑戰。尤其係強隊往往擅長於一擊定勝負,只要盧卡古一上前助攻、一個唔小心甩波,就會畀到好大機會對手反攻,造成不可挽回嘅大錯。更何況,盧卡古雖真係未打過歐聯比賽架!

但賽前最有皇者風度嘅發言,應該要數靴里拉,聽落簡直有啲隊長發言嘅味道:「我哋要記住自己點打入歐聯,勝出歐霸當然係美好嘅事,不過始終都係歐霸。上季聯賽第6唔係一個好成績,所以對每一隊歐聯球隊我哋都要好尊重,佢哋都值得佔一席位。巴素利多年來都係瑞士皇者,好有潛質之餘亦向全球輸出好球員。我哋要尊重每個對手,唔好忘本,一步步嚟。我哋唔可以只係依靠盧卡古,普巴有入波、福仔有入波,馬迪爾、馬達都要有入波,我哋要將入波變成我哋嘅DNA。而盧卡古無歐聯經驗唔重要,最緊要佢有渴求,想勝利,想畀人重視。」單係睇呢段歐聯獨白,係唔係好有隊長風度先?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • @michael@
    @michael@ 於 12/09/2017 評論 NO. 1

    如以頭兩場氣勢,根本穩操勝卷,但上場因國際賽及人腳調節下被逼和,可能影響士氣。摩佬在排陣方面已為今場歐聯作準備,雖然不太滿意結果。

  • 輝輝輝
    輝輝輝 於 12/09/2017 評論 NO. 2

    馬迪打中堅,靴里拉做返防中,有無得諗呢?

快捷鍵:←
快捷鍵:→