曼聯專區小評：2013年 黃金一代正式落幕 精選

3月19日，一代金童奧雲宣佈掛靴；5月8日，在英超征戰廿七年的爵爺宣佈退休；到16號，到萬人迷碧咸掛靴…除咗佢哋，仲有史高斯、利記的加歷查，九十年代的黃金英超一代，到2013好似已經到達完全退下來的時候了。

筆者都叫睇住碧咸大，對於熱愛足球的球迷亦然：萬人迷年青時脾氣同朗尼真係有得揮，才能更加係人人都讚同，好似1996年曼聯對溫布頓一下60米開外的超遠距離射門；到1998年世界杯時因為紅牌成為英國人民的「公敵」；到慢慢變改，性格變得成熟沉穩，好似2001年世界杯預賽對陣希臘時的救主；2002年世界杯對陣阿根廷十二碼一雪前恥；到皇馬唔知有幾多條A的黃金時代、到美國發展時大家的失望、返去AC時大家的興奮，最後出現在歐聯場上大家的激動…每一個時刻都好似發生無耐，每一個片段都好似電視回播一樣，歷歷在目。
而爵爺的一生，更加係筆者追蹤唔到嘅：佢開始教曼聯時筆者仲喺襁褓之中！爵爺睇住簡大帝起飛腳；睇住七小福成長；睇住c朗大；打造一個又一個的皇朝，不過呢啲都成為過去…75年5月2日出世的碧咸、79年12月出世的奧雲，74年的史高斯，78年的加歷查都一一退下來，70後好似已經買少見少。再加上靈魂人物爵爺的退休，睇嚟英超將真正踏入一個新紀元。在所有人事的改變之前，就等我哋好好記住呢班黃金一代，為佢哋致敬！PS：傑斯你…算啦，你都係怪物嚟架喇，唔理你喇！喺曼聯陣中領軍多一年，就去教練團隊領軍啦！