曼聯專區小評:高層最終下注!普巴!

曼聯專區 於 18/12/2018 發表 收藏文章
明眼人都看得到,摩連奴早早已經成為更衣室的不受歡迎人物,當中有好多原因、好多故事,但最最重要的一定要數佢同普巴嘅關係,甚至有球評家曾經斷言曼聯更衣室問題源自普巴同摩連奴。大家可以先望望呢條片:
開開心心嘅普巴同完卡域克擊掌,點知俾摩連奴串到嬲嬲豬。明顯2人一接近就已經出現負面氣牆,成隊波嘅心態同精神都似乎被影響咗。先唔好講摩連奴能唔能夠引導出普巴嘅最強實力,分分鐘連要佢打出戰術要求都未必做得到。中間又有副隊長事件、又有普巴打入冷宮,總之就係明爭暗鬥,大家見到呢對難兄難弟都心中惴惴,唔知幾時又爆大鑊,咁點會有正面心態踢好場波呢?

於是球員都只有分邊一途,要揀撐魔連奴定係撐普巴。但摩連奴份人硬掘掘,得罪人多之下又有幾多球員真心企佢嗰邊?梳爾斷腳差啲掛靴,摩帥無幫口之餘仲話佢份人心態唔硬淨唔夠man;馬迪爾份人信心其實唔太夠,要人推多幾下先有好表現,摩帥就決定推佢落海踩多兩腳。加上佢又同普巴同鄉,同聲同氣之下又點會有好話。再諗都估到,連格特同普巴咁好朋友,揀邊好容易。呢個問題到利物浦一役推上臨界點,球隊輸緊普巴都無得出,大爆發已經逼在眉睫。揀保住普巴?定係保住摩連奴?大家依家都知高層點揀。

當然,高層應該點都有考慮「普巴幫」在曼聯的影響力,與及為球隊可以帶來嘅正面影響。不過更重要嘅考量,可能同戰術都有關係。摩連奴防守至上的戰術好出名,而對強隊時放棄控球、力求封鎖對手高速球員、全力截下對手所有傳送同射門路線,呢啲已經係摩帥的首本名曲。所以對強隊得30%控球權、3至4腳攻門,被對手狂攻已經係司空見慣,有時確係偷雞成功。好似當年靴里拉凍結夏神,又好似今季對車仔僅僅被逼和,甚至係剛剛過去對利物浦時凍結沙拿,都係成功例子。

只不過呢一種方式非常踩鋼線,難保對手好好彩,36腳攻門總有一、兩腳好彩碌入;而且風格上同曼聯過去傳統極為不合,以前只有紅魔狂攻、對手措手不及,邊有全隊退守期望反擊得手。

於是,既唔妥摩帥風格、戰術,同時又決定信任「普巴幫」落場比賽嘅真正實力,高層決定豪賭一鋪,重注普巴。依家兩個炸彈拆一個,另一個炸彈會唔會心情舒爽,槍口向外化身強襲飛彈,為曼聯全力搏盡呢?咁就要睇下聖誕新年賽期普巴有無得正選上陣,同埋有無計帶領疲兵重回穩定勝軌了。

如果喜歡我們的文章,請即分享到︰

標籤: 曼聯專區小評  普巴  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→