曼聯專區小評：雲高爾的五大任務 精選

聽到五大任務，你可能又會估係買呢個買嗰個；執後防執前線等等。不過，今次可能令你失望，因為呢篇文同個陣點執關係唔大！咁，係邊五個任務？

第一，在世界盃打出好成績！
世界盃又關曼聯事？唔通筆者想要雲高爾帶領曼聯奪得世界盃冠軍？嗯…呢個「夢想」可以遲啲先算，筆者想講嘅係一系列故仔。2004年歐國盃的前夕，熱刺簽下法國教練辛天尼。不過，法國在歐國盃輸到一塌糊塗，早早就離開希臘返屋企休息。於是乎，辛天尼在熱刺上任時威信處於低點，短短13場比賽之後就離開白鹿徑了。另一個故仔，史高拉利2008年帶領葡萄牙在歐國盃失利，其後在車路士的日子亦不好過，7個月貨仔就走了。遠啲啲，1982年時文諾迪無法為阿根廷奪得世盃，之後佢帶領的巴塞亦變得無哂霸氣。所以，你話世界盃同球會賽事無關係？其實佢對教練的威信有決定性的作用，小組賽對住西班牙同智利，大半組的死亡之組對曼聯、對雲高爾而言都係一大考驗！
第二，重新打造小紅魔的天下
雲高爾出名喜歡用小將，巴塞時的小白同沙維係佢提拔的；拜仁的卻奧斯同梅拿都係佢搵出來的；而阿績士時代的施多夫、雲達沙、古華特更加係無嘢好講。反觀莫帥比較鍾愛經驗豐富的球員，最後一場波連入兩粒的小紅魔威爾遜，在莫帥手下分鐘上場機會都無；上年簽入嘅烏拉圭小將華利拿都係無上過場；更加唔好講遠在天邊的放逐者沙夏。只係得一個贊奴沙唔係曼聯的傳統，雲高爾的另一個任務係令隊中的新將重新獲得機會。

第三，重新建立更衣室秩序
其實都幾令人心痛，最近有消息指莫帥無法統馭一眾紅魔球星，在更衣室中甚至試過不吭一聲。在更衣室失控的情況之下，「鐵腕」雲高爾絕對是隊中必須的人物，佢來重現爵爺的風筒是再適合不過。佢同李華度的打大交；同拜仁的東尼不合，都係佢要球隊成為心目中面貌時的犧牲者。當然，呢個情況之下，朗尼正正就係新「犧牲者」的頭號熱門。不過，佢有雲佩斯的協助之下，重建更衣室秩序並不是孤軍作戰，雲帥有必要在新一季開始前整頓軍心。
第四，紅魔攻擊模式重啟
大家都應該唔會否認，在費爵爺執教的最後幾年，曼聯其實已經變得保守同謹慎，92黃金一代時水銀瀉地、每一個球員都識入波、每一個球員都係威脅嘅日子已經過去。在爵爺的離開之後，莫帥其實有機會再一次重啟紅魔的恐怖攻力，然而佢選擇咗更保守的踢法，於是曼聯嘅打法變得更易被對手掌握、更被動、更防守。而新的契機，在崇尚攻擊的雲帥身上再次見到曙光。全攻型係佢喜用的模式，好似2001年荷蘭就曾經用過四箭頭的奇陣；而2014世盃外圍賽荷蘭的入球僅次於德國亦是雲帥攻擊體系的具現化。在英超打出強攻型足球是否有效尚未知道，不過攻門至上的「進攻足球」一定會令球迷睇得好開心。

5. 破舊立新
相對於莫帥一簽就是6年，可見曼聯高層是想他成為曼聯的長久領軍人物，與其他三幾日就轉領隊的球隊畫上分野。但不幸的是，格拉沙的耐性與球隊中的分歧令他不得不離開。相反，雲高爾的CV係最好明證，燥動不安的性格令雲帥絕不停留在同一隊超過5年，而3年的合約亦顯示出曼聯高層有心理準備。而曼聯呢一步，其實係要refresh一下26年來在爵爺穩定的領導下帶來的負面影響。作為長久的領軍人物雲帥不是好選擇，不過要破舊立新的話佢係好好嘅人選。呢3年佢要做嘅就係打好根基、好好培養下一任的新帥，亦即係筆者心目中另一位可以教足30年的人物：傑斯。