曼聯專區小評:隊波無玩嘢!分野在戰術

曼聯專區 於 31/12/2018 發表 收藏文章
筆者其實忍手忍咗一段時間,唔太敢評論蘇B麾下嘅曼聯。始終佢接手之後對手都唔算太強,加上一隊波嘅足球哲學唔係話改就改,究竟換帥之後曼聯會慣晒打防守?定係可以改為攻擊至上?呢一切都要時間證明,而睇咗3場波之後,總算都可以有信心歸納少少球隊嘅精神面貌。

其實要講,兩句講晒:「主宰節奏,以守為攻」;與及「控球在腳,尋找空隙」。睇一睇摩帥時嘅比賽數據同埋依家嘅數據,即可以睇得出分別。睇返對中下游球隊先:

修咸頓: 2:2,己隊控球60%,射門11次
水晶宮: 0:0,己隊控球60%,射門12次
卡迪夫: 5:1,己隊控球75%,射門17次
哈特斯菲:3:1,己隊控球65%,射門16次
般尼茅夫:4:1,己隊控球65%,射門11次

就咁睇,數字上分野雖然唔算好大,但睇得出蘇B嘅曼聯比較重視控球同攻門,控球率同射門數字都稍有提升。但球迷們應該好有感受,兩個年代曼聯俾人嘅觀感極為唔同,因為另一個重要數據係「被攻門」:
修咸頓: 對手射門16次
水晶宮: 對手射門13次
卡迪夫: 對手射門9次
哈特斯菲:對手射門10次
般尼茅夫:對手射門7次

明顯地,蘇B麾下嘅曼聯更著重控球在腳,擅於在禁區外圍傳送,製造、守候機會;而且防線壓前,令對手不敢掉以輕心、輕率進攻。只因大軍壓前,一個唔小心甩波,俾福仔、連加特、普巴等人力爆,被攻入的機會極高;但死守亦係唔妥,因為呢幾位球員亦有突破能力,有好多板斧撕破防線,於是跌入進退失據的尷尬情況。但睇摩佬嘅曼聯,佢寧可放對手攻多幾腳,都銳意要球員留守後方,希望以人多蝦人少嘅手法減少失波。呢個情況下,攻擊人手比較少,自然入波都唔多;同時亦未計算幸運因素,俾更多機會對手「負碌」入球。

更進一步睇,球隊的連繫亦因為球隊偏向進攻而變得更為緊密。摩佬喜歡泊大巴,要求球員防守至上,有試過馬迪稍稍推波到中前場已經俾摩連奴大鬧,可見防線推得幾後。正因如此,後防球員圍繞己方禁區,中場球員要配合拎波就要更為後退,但前線球員就得返備受重用、企定定喺對方禁區前後嘅盧卡古。簡單嚟講,中後場拎到波之後面對一個極大的空白空間,入面又有唔少對手守衛,唯有長傳急攻大腳斬先可以俾到攻擊點,但一來遠攻從來準繩度都唔高(有碧咸在陣唔同講法);二來盧卡古停波攞波能力麻麻,於是中場大腳成日傳送失誤,盧卡古又拎唔到波,攻擊自然疲弱,只能依賴福仔、馬迪爾偶然以個人突破成就進攻。

依家曼聯整體壓前,後防少不免出現更多空位、更多甩漏,但以快打快的情況下對手傳送準確度亦會受影響,同時都唔敢壓得太前。因此戰場明顯前移,爭逐多於對方後半場發生,幾腳波已經可以刺入心臟地帶,攻擊流暢之餘助攻人手亦更多。你見到馬迪有波入,連迪路夫多番助攻,就係呢個原因。而最大的受益者一定係普巴,之前鞭長莫及嘅佢做得防務嚟就攻唔到,攻得太前又俾人鬧;依家成隊波壓前,佢就有更多空間可以發揮所長,就算參與防務都好,依家在中圈前方攔截完,幾步就可以跑到入娥眉月進攻,比起摩帥年代要跑餐死差好遠,正好解釋到呢幾場佢入波又助攻。

當然呢幾場波對手唔強,當然可以做到呢樣。但對強隊又點呢?筆者下篇文再同大家傾下。

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • lok tim sin
    lok tim sin 於 31/12/2018 評論 NO. 1

    利申曼迷,其實講乜戰術,打乜戰術,班球員唔聽你支笛,你有幾好戰術策略都冇用。冇錯,這贏3場波,係對弱隊,但在摩帥帶領的曼聯,對強隊死守,對弱隊冇辦法入波,起碼現在對弱隊有得贏先。順帶一提,摩帥帶車路士時,有度奥巴,國米時,有伊巴,帶皇馬時有C朗,都係用一個神鋒搞掂,後面防守,現在曼聯,靠盧卡古,你話可以嗎?

  • ShunFei
    ShunFei 於 01/01/2019 評論 NO. 2

    係球員玩野,亦都係戰術唔啱。

快捷鍵:←
快捷鍵:→