曼聯專區小評:重建曼聯要靠「曼聯魂」

曼聯專區 於 17/05/2019 發表 收藏文章
曼聯球員準時放暑假,而蘇B嘅工作當然要繼續啦。重建球隊需時,而且依家曼聯內憂外患俱至,要保住「豪門」之名實在要好努力好努力先得。但問題千頭萬緒,邊一樣最難處理?天空體育專欄作家Andy Mitten有自己嘅睇法。

佢認為依家曼聯最大問題,就係「太肥」。而呢個「肥仔」之所以出現,在於高層早前做錯一步,認為有錢就可以「重建球隊」,於是咩都諗住用錢解決。於是轉會費、球員人工都開始水漲船高,好似山齊士就係一例:人工好高,水準好低;對佢有興趣嘅球隊俾唔起錢買,俾得起錢嘅球會無興趣買,於是成為球隊雞肋。同樣地,馬迪爾都出現同樣情況:有說續約之後佢嘅薪金高達19萬鎊。作為一個年輕人,雖然潛力唔差,但對於表現唔夠穩定、心理質素唔夠成熟嘅球員而言,呢個價只會拖累咗佢嘅發展。

更進一步,你咁財大氣粗,你估其他球會見唔到?經理人見唔到?於是人人獅子開大口,明明「傳曼聯」用2000萬鎊買人,球會坐地起價到4000萬鎊;明明續約球員要10萬周薪,經理人叫價叫到20萬。於是球員係就係買到、約又真係續咗,到唔啱用時就難以脫手。個價咁高,點放?個人工咁高,搵咩人接手?大家最「心愛」嘅普巴就係表表者,身價非同一般,但破壞力亦非同一般,依家放又無人敢接手,用佢的話又改變唔到佢嘅桀驁不馴,於是成為球隊割唔走、教唔好嘅毒瘤。

面對呢個嚴峻之極嘅問題,蘇B有咩對策?佢剛剛同曼聯官方所做嘅訪問就係答案:「我哋會教球員、教小紅魔正確嘅價值觀。我一直深信,一個好球員一定係一個好人。你要同球會有一樣嘅價值觀,要有獨特嘅態度先可以成為一位真正嘅曼聯球員。我哋最想見到曼聯後衛捨命防守,而對強隊時前鋒鏟波攔截會得到球迷掌聲,呢個就係曼聯文化,曼聯精神。我哋會喺市場中搵到呢種有曼聯魂嘅球員,買佢返嚟。」

聰明嘅你,應該聽得出蘇B嘅言外之音:佢唔係要買即食球員,而係要買同球會有一樣目標、同樣精神面貌嘅球員,哪怕係年輕到20未夠,哪怕要好幾年訓練佢成材 (就好似費查、C朗、維迪,甚至係92班一樣) 佢都在所不惜。所以可以預期,蘇B買返嚟嘅好可能係名不見經傳,唔多人識嘅小將,買佢哋可能會貴過市價,但總比買已經成名嘅球星平一大截。而隊中問題兒童,如果真係無曼聯魂嘅話,蘇B應該會盡力放售,放唔到,唯有試下用曼聯意識逼佢洗腦。

所以,重建曼聯絕對唔係一朝一夕嘅事當可斷言。慢慢踢走隊中嘅毒瘤,慢慢引入可以成才嘅「曼聯系球員」,再慢慢提拔青年軍嘅可造之才,好幾年嘅「溝淡」之後,將雲帥、摩帥亂買返嚟、唔啱曼聯傳統嘅球員清掃之後,新生曼聯先有可能繼續爭雄。所以呢幾年?爭第4似乎已經係最高目標,曼聯球迷要忍受一下喇。但如果可以restore 曼聯傳統、曼聯色彩入球隊,等幾多年都無所謂,係唔係?

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Yip Pak Teng Jason
    Yip Pak Teng Jason 於 18/05/2019 評論 NO. 1

    之前幾個領隊買埋d普通球迷都知嘅有名球員 而唔係買有潛力嘅 要班球探黎做咩 睇足球週刑買就得啦

快捷鍵:←
快捷鍵:→