曼聯專區小評:連加特由世界盃「跑」返嚟喇!

曼聯專區 於 19/07/2018 發表 收藏文章
世界盃完咗,大家回復正常生活未呢?日日有波睇嘅生活,真係俾錢買都買唔到!不過要完嘅始終都要完,今個盛事入面你最有印象係邊個球員,邊個moment?筆者首先同大家分享一下今季英格蘭嘅瑰寶之一:連加特!

當年曼聯助教韋倫就咁樣形容連加特:「佢身型真係輸蝕,不過佢有耐性,肯同隊友展現互信,所以無嘢係唔可能。我見過好多小球員因為受傷、因為身型唔夠強壯而離開青訓場,但亦有充滿意志嘅球員,呢樣係最強大嘅無形資產。」讚連加特,唔係讚佢腳法、唔係讚佢射術,佢過人之處在於「意志」。

無他,單睇英軍對瑞典一役連加特跑動係全隊之冠,跑足12公里嘅佢,足足比第二名嘅捷比亞跑多1.3公里!當然只係跑係無用的,位置感唔好、跑錯位浪費氣力,其實都係一種罪。之但係連格特就係有種閱讀球賽的能力,對於中前場的連繫起到關鍵作用。「馬甲領隊」修夫基如是說:「連格特對於空間嘅認知能力好強,擅長無球跑動,遠離皮球的情況下依然可以連繫中場及前鋒線。」就係咁,努力跑跑跑嘅佢,加上位置感同埋少少腳法,成就咗一位令人刮目相看嘅新星。

三獅當中有連格特不可或缺嘅位置,咁曼聯呢?加利仔就咁講:「連格特跑動超多,作為隊友你會好開心有佢同你拍檔。佢令我諗起朴智星。人人都只係記得C朗、朗尼,但無星仔同夏格維斯呢種球員的話,球隊就會失去平衡。連加特就係呢種球員,佢為隊伍帶來源源不絕嘅動力,佢可以連繫普巴、盧卡古等出色球員。」

打咗咁多場波,作為球迷亦睇到連加特有幾明顯嘅進步,信心比起小組賽時增加唔少,亦可以預期佢可以將呢種強大帶返曼聯!如果運用得宜,佢會唔會成為解放普巴、山齊士嘅關鍵人物呢?諸君不妨好好期待一下!

如果喜歡我們的文章,請即分享到︰

標籤: 曼聯  連加特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→