曼聯專區小評：迪基亞亂局乃三輸局面 精選

迪基亞最後戲劇性地無走到，最後一分鐘交易告吹，曼聯仲要出官方說法「我哋唔介意迪基亞留效」。成件事根本就係一個3失局面，最後的得益者只會係皇馬、曼聯之外的球隊。呢個係混亂、三敗俱傷之局，損己而不利人…



先係迪基亞，對佢而言成件事都幾被動，不過佢亦係最受傷害的人之一。混亂過後，西班牙國家隊教練迪保斯基（Vicente del Bosque）就講明迪基亞如果仍然日日坐冷板凳，都幾難畀佢歐國盃上陣：「我未得閒同佢傾，不過我知我有需要同迪基亞深入一談，我有嘢同佢講。佢一定要保持自己的專業，走出呢一個亂局。希望佢可以為球隊正選上陣啦，咁係最好。佢聯賽表現好，我哋先可以帶佢一齊去歐國盃，如果連上陣機會都無，我真係好難可以帶佢去…」其實唔駛筆者講，大家都估到狂牛下一任的正選門將好大機會係迪基亞，依家卡斯拿斯不再效力皇馬，迪基亞如果效力頂級球會，一定有更大的機會為國爭光。只係依家曼聯由方丈主政，萬一佢繼續雪藏佢，咁就萬事俱休了…表面上，迪基亞一定要好好爭取上陣機會，只係實情得唔得，咁就真係不得而知了…


對於曼聯，情況其實一啲都唔好。雲帥之前都講得啱，作為西班牙人、女友又係西班牙人、一屋屋企人都係西班牙人，迪基亞要返家鄉都係無可避免。再加上佢一直都唔宣示忠誠，一早已經暗示自己離隊意向，唔好似史達寧咁做出面已經算係畀足面曼聯，既然心都唔喺到，唔放人又可以點？咪好似季前賽時咁專心唔到、唔投入，對球隊都未必係好事。現實啲講佢離隊都幾成事實，最好當然係在有限的時間、空間中取得最多好處，唔通由佢自由身離隊咩。家下賣唔成，佢一係就一月以更低價走，一係就季尾自由身走，曼聯一係就蝕一半轉會費、一係就蝕哂，點計都係蝕。再加上對方都將另一位門將基羅拿華斯作為交換條件，級數上雖然未及迪基亞，不過作為哥斯達黎加世界盃英雄之一，呢個交易再加上轉會費，去換一個只剩一年約的「神龍」，總好過咩都無。家下？泡湯lu。


對於皇馬，損失係就係有，不過應該係較少，因為迪基亞遲早都係佢哋嘅人，半年後？一年後？只係時間問題。如果樂觀啲睇，佢哋仲可以唔駛咁貴就得到迪基亞添！幾多錢？自由簽佢sign on fee大約係1200萬鎊，佢哋可以慳返成半…可能對佢哋而言，最大的問題可能係迪基亞一旦為曼聯上陣歐聯而佢又一月轉會去皇馬，咁就無得為皇馬打歐聯囉…



你可以話問題出喺2隊的溝通問題之上，亦可以歸疚於西班牙同英格蘭點解轉會窗關上時間唔同，而迪基亞、拿華斯同時轉會引起的麻煩就令件事泡湯…不過有英媒就提出，其實有一個方法可以解決，基於西班牙方於8月30日時是「許賣不許買」，何不讓迪基亞先以4000萬歐元轉投皇馬，再在之後一日將拿華斯以1500萬歐元賣去曼聯？嗯。好計謀，不過太遲了…