曼聯專區小評:轉會新聞再次沉寂的原因?

曼聯專區 於 27/05/2014 發表 收藏文章
雲高爾加盟之後,大家一致認為佢嘅威望同經驗會令更多球員想投曼聯,而一直傳緊的目標亦好大機會加盟。但係現實係,曼聯消息人士指雲帥已經唔再想要卻奧斯;梳爾的加盟新聞越來越淡、加上艾夫拿的續約,梳爾成魔機會又細咗;而士缽亭悍將威廉卡維奴的轉聞更加係消聲匿跡。究竟係雲帥名大於實、真係買唔到人?定係佢另有諗法呢?

單睇卻奧斯的情況,雲帥應該係「主動放棄」。卻奧斯最佳位置係10號攻擊中場,其實曼聯陣中已有馬達、香川,呢個位不愁人選。當然,卻奧斯可以再打後一格,在拜仁時都打過box to box中場;又試過在433的陣式中打中場中,好似幾啱曼聯用。然而以雲帥主動放棄的原因睇嚟,一方面見卻奧斯因為唔係真心想走,而係希望以曼聯做一個楔子爭取加薪;另一方面雲帥要嘅可能係更有機動性的中場球員,而且中場亦唔係卻奧斯最拿手的位置。所以…佢成魔的機會,應該唔大。

威廉卡維奴呢?佢作為一位年輕防中,機動性同力量應該無問題,咁點解雲帥又無跟進呢?在葡萄牙穩佔防中位置,佢應該對雲帥的防務有一定的幫助。不過,佢有一個弱點係難以克服的,就係傳送能力唔強。在莫帥的藍圖中,佢係攔截型的中場,截到波之後要交波俾另一位球員做駁腳先可以「策反」,不過咁樣就太慢喇!雲帥要一位又快又準的中後場較炮手,要好似卡域克當打之時一樣,在後半場頻頻交出致命長傳。

由此可見,雲帥心目中要搵的中場人物係要識長傳急攻、機動力高,咁中場人物要邊個先係最合適呢?荷蘭國腳史杜特文、畢爾包的24歲中場安達靴里拉都係好好嘅人選。當然,筆者認為仲有一個極佳的選擇:朗尼!多次遠程炮助攻雲佩斯的朗尼,唔單止攔截能力強、爛打,仲要「厚多士」,走上走落、做box to box中場完全無問題。在雲帥一直用開的「防反戰術」中,佢絕對有能力做中後場的策反指揮官。問題係,佢要聽聽話話唔打前鋒先得…

而梳爾的問題,其實是「叫價過高」。近3000萬鎊的身價、100,000鎊的周薪,話就話佢係「擬似英格蘭明日之星」,不過連歐聯都未打過嘅球員、未經驗過真正考驗的梳爾真係值呢個價?呢個無人可以答得到…更重要的是,呢個咁高嘅薪金會頂爛市,佢一入隊韋碧克、包維等人一定會叫價加人工。朗尼已經做衰咗個頭,雲帥有必要整頓球員的薪金同心態。所以梳爾唔係唔買得,不過一定唔可以係呢個咁高轉會費、咁高人工的前題之下。

綜合而言,雲帥就算手執大筆資金,都唔係話買就買,佢要照顧一連串的問題,薪金的架構、對戰術的重組、球隊的微調,喺世界盃已經一頭煙的雲帥嚟講,曼聯的事宜都係暫時放一邊好啲,太急進反而好易壞事。大家等睇佢世界盃表演,之後先期待曼聯的新將啦!
史杜特文都幾好J架!

如果喜歡我們的文章,請即分享到︰

留言


請按此登錄後留言。未成為會員? 立即註冊
  • RD P仔 於 29/05/2014 評論 NO. 1

    球季未完結已經狂吹買邊個邊個,而家將熾熱既新聞冷卻一下,咪比對手同賣家托價,係明智之舉,而同時在背後不斷做工作,等世盃完結,應該會可以向外公布了

快捷鍵:←
快捷鍵:→