【曼聯專區小評:轉會問題積重難返 8年前「做壞個頭」】

曼聯專區 於 24/09/2020 發表 收藏文章
作為英超豪門之一,曼聯自爵爺退休之後轉會嘅問題就無改善過。大家有印象的話,近幾年每個轉會窗都係拖泥帶水:費蘭尼最後一日最後一刻先加盟、冬季窗要搵馬達嚟救亡(其實般奴都係年中加盟),到今年買嚟買去都只係買得一個雲迪碧克。參考艾夫拿所講同埋其他報道,我哋可以歸納幾個「基爾年代」同「活華特年代」嘅分別:

-以前想買人,係爵爺同基爾一齊去「三顧草廬」;依家係活華特派個律師去就算
-以前人工架構合理啲分佈;依家打後備都幾十萬鎊周薪
-以前買人速度快,呢頭傾嗰頭俾錢;依家拖十世都未完
-以前曼聯轉會窗有say,爵爺、基爾有江湖地位人人尊敬,再加上名氣頂級,大有「你唔賣俾我我就揀第二個,你咪唔好賣」嘅氣概,所以對方還價有個譜。依家你緊張過對面,人哋安安落落:「我企硬價你都會返嚟,做咩要蝕賣?」
-以前唔啱使嘅球員 (或者唔聽話嘅) 一定會被肅清,兩秒就唔見人 (其實好多次賣人嗰刻小編都O晒咀) ;依家?你賣都無人要!

加利仔其實一語道破:「依家曼聯已經無晒轉會窗嘅話語權,喺轉會市場完全陷於被動。8年來,身在其位嘅人有責任打造一隊冠軍級人馬,但最後佢哋無完成到應盡嘅責任。」有啲嘢唔可以唔認,足球就係一個講圈子、講人脈嘅運動。你諗下就知:我手上有個超級新星,點解我要賣俾你唔自己用?又或者等佢再高價啲我先賣?當中一定係有妥協、有「友情價」,正如雲迪碧克嘅來投,小編認為無阿積士高層雲達沙做推手,一定唔可能成事。而依家曼聯嘅問題就係外行人領導內行人,用純商業手段去搞足球,「有價有市」嘅最後結果,就係你要用高出市價嘅價錢去買人;同時你手上嘅貨尾永遠出唔到,要擺倉底。

如果情況繼續,球隊嘅自我崩解係意料之內:買人只會越來越貴、價格越來越唔合理;而嚟到嘅新球員亦會討價還價,要求唔合理嘅薪金,而且充滿搵錢心態,唔專注踢波。所以蘇B雖然受千夫所指,但小編認為佢係力挽狂瀾之中:雲達碧克收購過程中,佢係上門去遊說過,希望用返爵爺嘅一套;辛祖嘅談判之中,蘇B寧願用心力時間去傾掂條款先,就係唔想薪金架構進入惡性循環,最少唔好俾情況惡化落去 (因為好明顯辛祖經理人獅子開大口,萬一接受咗個天價薪金,隨時動搖國本) 佢依家一個人做晒爵爺加大衛基爾嘅工作,仲想點?





如果喜歡我們的文章,請即分享到︰

標籤: 曼聯專區小評  轉會  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→