曼聯專區小評:費特嘅發展可以期待!

曼聯專區 於 16/08/2018 發表 收藏文章
揭幕戰睇曼聯,雖然贏波但光芒似乎不及其他強隊,被狐狸力逼之餘新將費特又好似無甚建樹;球員又壓到好後,見唔到強橫攻勢,唔通摩連奴「三年之詛」真係重現?咪住先,睇埋球員點講先!

首先山齊士同普巴都不約而同地大讚費特,山神更認為佢同彭利拿可以「解放」到自己咁話:「其實第一場波費特已經打動我。球隊少緊啲嘢,無咗巴西人稱之為『jogo bonito (亮麗足球)』嘅元素。我認為佢同彭利拿都有呢個元素俾到球隊,佢哋有好強嘅質素,亦會幫到我好多。」而普巴亦表示自己同費特夾得好舒服,隨時大有作為咁話。其實費特俾到咩球隊,係我哋未必咁留意到嘅呢?

首先,佢為曼聯中場再添加更多動力,係另一個「中場發電機」。過去幾年有睇曼聯,都知一出某幾個人球隊嘅速度就會大大降低,例如馬達、普巴都會令中場速度下降。前者真係欠缺速度,仲要佢打邊的話就會令行軍變慢;而以前嘅普巴就係上腳太多。中場太慢往往令反擊嘅有效程度下降,對手有時間回防,無法攻其無備。但費特嘅加速力、傳送力,都可以令球隊節奏變得更快。普巴今次世界盃之旅,或者令佢發現自己唔扭咁多,打得直接啲會有著數。只要唔再堅持上腳,肯乖乖哋做串連角色,偶爾突入做影子殺手,上腳就會少,速度就會快。加上原本就係以速度同腳法見稱嘅彭利拿,呢3個球員有望組成一個快速運轉嘅中場線,連接中前場打散對手節奏同部署。

睇返費特,佢俾人譽為「費蘭甸奴後繼者」,因為佢喺薩克達時同費蘭甸奴一樣,都係打box to box中場,不過位置就偏後,比較防中傾向。如果咁睇,佢同彭利拿有機會逗得更深,組成儼然雙防中嘅打法,普巴就可以解放得更前。而呢個陣式有咩問題時可以用靴里拉、馬迪代替,以4231作為防守嘅根本。不過呢個陣式其實可以變身,進攻時雙防中向前移,普巴移到三叉中場當中左路擅長嘅位置;而原本司職左右中場嘅球員(最理想係山神、福仔)可以更深入敵陣,搖身一變成為433進取陣式。

當然,呢一仗只係費特嘅處子戰,同隊友仲有好多時間可以夾默契;另一方面佢英文又未學好,溝通又差少少。假以時日,我哋先可以睇到費特係唔係值得身價,有無辦法成為曼聯中場另一個重要人物!

如果喜歡我們的文章,請即分享到︰

標籤: 曼聯專區小評  費特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→