曼聯專區小評:讓我們陪曼聯一齊長大

曼聯專區 於 06/05/2019 發表 收藏文章
蘇B一接手真係幾甜美,但當蜜月期一過,球隊好快就故態復萌,成績又變返麻麻哋。呢個情況都頗正常:論球隊實力,馬迪爾、福仔充其量只係二線頭一線尾嘅潛質新星,要獨當一面、領軍突破僵局,始終尚欠火候。中場方面,普巴實力上算係一線中場,但狀態飄忽時好時壞,只可以當二線頭中場嚟看待。馬迪、馬達去到靴里拉,後防鍾斯、楊格,通通唔可以稱得上一線。有睇開專區文章,筆者不嬲都強調一隊二線球隊都可以打出一流足球,分野在於心態。蘇B剛上任,大家有新希望、新目標、新衝擊,心理上有寄託,自然發揮到百二分實力。不過當佢真係坐正,球員們難免要正視返球隊一直存在嘅問題,無咗「爆seed」嘅心理輔助,自然回到正常水準,爭唔到前4只係「正常發揮」。

依家一切塵埃落定,領隊人選確定,球會又鐵定無歐聯比賽,呢個先係真真正正嘅新開始。正如前曼聯球員Paul Parker所言,蘇B可以帶來正面氣氛,佢上任人人都開心,但長遠而言佢無經驗、欠缺人脈,要吸引最頂級球員來投其實好困難。再睇,曼聯無歐聯席位在手,唔單止令一線球員卻步,仲有機會令隊中球星離隊,好似普巴、迪基亞,隨時可以用「無歐聯」的原因要求轉會。推論落去,今夏嘅轉會窗未必買到即時改變戰局嘅球星級人物,更有可能失去隊中靈魂人物。簡單嚟講,要喺嚟緊幾年同英超列強爭逐,似乎已經無咩可能。

曼聯皇朝,唔通真係由此沒落?真係要步上利物浦嘅沉淪後路?低沉睇嚟係不可避免,不過會唔會一沉就沉多十年廿年,依家就係轉捩點。筆者認為要改變形勢,曼聯有必要向修夫基嘅三獅軍團借鏡。世界盃打出亮麗成績嘅英軍,其實人腳唔見得好強,球員名氣唔算好大,外間都唔太睇好。點解佢哋可以打得咁出色?原因亦係筆者之前所講:心態,同隊型。修夫基可以話係同呢隊英軍一齊長大,由青年軍開始教起,知道隊中各人嘅脾性,知道點樣同佢哋合作。三獅嘅成功,在於幾年前已經做緊大家睇唔到嘅準備功夫,打造默契同團隊。

呢一刻,蘇B要做嘅其實都係一樣。佢教過曼聯青年軍,知道福仔、連格特、普巴(如果今季唔走)嘅化學作用,更知道一眾小將嘅進步空間。當追求外在球星變得困難重重,蘇B更加要倚重隊中青訓產物,以佢哋多年來嘅默契同成長,作為曼聯中興嘅本錢。其實蘇B自己好明白,周日一戰派遣小將鐘達希(Tahith Chong)上陣已經見到佢嘅「企圖」:球隊未來,要喺隊入面搵。

作為攻擊球員,鐘達希有速度有射門觸覺,係另一位青年軍快馬;除佢之外隊中仲有幾位等緊上位嘅年輕人,好似1米82嘅6號仔占美格蘭 (Jimmy Garner),可以司職中場又可以打後衛,而且有指揮官嘅潛質,有望可以接替靴里拉、馬迪嘅位置。蘇B亦曾經讚過右閘Ethan Laird 萊德,年紀輕輕已經被外間冠以明日新星之名,有望頂替楊格、華倫西亞接掌右路。至於格連活特Mason Greenwood 同埋中場新星安祖高美斯(Angel Gomes)就更加唔駛講啦,好多曼聯迷都對佢哋好有認識,前者為「妖人級數」嘅前鋒,雖然面對福仔、渣古嘅挑戰,仍然有望爭一隊席位;後者控波、傳送都出色,更加係英軍青年軍嘅隊長。繼承曼聯傳統一套嘅蘇B,絕對有可能盡用青訓產物,上面幾位球員幾歲人仔已經入曼聯青訓,默契、合作絕無問題,融合依家嘅一隊球員再磨合幾年,或者有機會複製三獅軍團嘅成功都唔一定!

只不過呢個模式絕非一蹴而至,新曼聯要慢慢成長、磨合,大家要俾幾年時間蘇B同埋青年軍嘅一眾小將,先可以有啲成績睇下……大家會唔會同筆者一樣,決定陪住曼聯再一次成長?
Greenwood與Jimmy Garner
鐘塔西

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Frozen Leung
    Frozen Leung 於 06/05/2019 評論 NO. 1

    垃圾就垃圾啦,成日講以前青訓點勁點勁,咪又係靠4424先贏到

  • rickyoscae
    rickyoscae 於 06/05/2019 評論 NO. 2

    如果敢用青訓,我一定陪

快捷鍵:←
快捷鍵:→