曼聯專區小評:莫拉達?唔會輸蝕得過基沙文!

曼聯專區 於 15/06/2017 發表 收藏文章
如果畀你揀,你要基沙文定係莫拉達?老實講,好多人都會意屬基沙文多啲,始終佢喺馬體會獨當一面,莫拉達除咗喺祖記證明過自己能力之外,喺皇馬好似總係擔唔起大旗咁。不過細心啲睇,莫拉達對曼聯嚟講,可能係一個更為適合嘅前鋒人選。

摩帥執掌至今一年,球隊各人都習慣咗前面有一個龐然大物做目標:伊巴。1米95嘅佢,腳法好大家都知,而佢以身高、身體抗性力壓對方後衛頂入唔少球亦係事實。但係基沙文只有1米76,相距真係不可以道理計,如果佢加盟的話,各攻擊球員好明顯都要改變一下心態同戰術。但係相比上嚟,1米89嘅莫拉達雖然無伊巴咁高,不過制空力絕對凌駕在基沙文之上。放佢喺前面,眾曼聯球員要改變嘅戰術反而唔多。而莫拉達身高之餘,身體對抗性亦唔差,「牙牙炸炸」亦好適合摩帥喜用嘅單前鋒戰術。始終要一個人單打獨鬥,身型差啲都唔掂,睇馬達就知。

而另一方面,基沙文打法上亦偏向「10號仔」輔鋒位置,正正就係摩連奴擅長陣式中無咩發揮嘅位置。摩帥喜好體力型中場,要佢哋上上落落box to box,攻守兼備。而呢個陣式之下,既然都預咗中場會攻上去,輔鋒位置就會同佢哋重疊,減少咗禁區入面嘅人腳。其實另一位曼聯心儀嘅盧卡古都係有呢種特質,可以喺禁區入面以寡敵眾仍然可以攻到門,係典型嘅9號球員。講咁耐其實目標都係想講,莫拉達都係一樣「似9多過10」!

更重要係,筆者都講過摩連奴係好睇重「弟子兵」嘅,伊巴就係佢「安插」喺曼聯的重要心腹。而比起基沙文,莫拉達就更加係佢嘅心腹,因為喺皇馬第一個起用佢嘅其實就係摩帥!2人情宜甚篤應該都唔駛懷疑,而摩連奴更加清楚莫拉達嘅優缺點,唔駛點磨合就可以放佢入正選;畀啲時間同隊友夾下應該可以發揮到呢位西班牙小將嘅能力。同埋,上面都講過喇,佢打法、身型都近似啲伊巴,夾佢點都易過夾基沙文。

呢一刻莫拉達未入隊啦,不過經理人就話個offer好吸引,加上佢自己都開始不斷follow同like曼聯中人,睇嚟成魔之路都踏上咗一半喇。接下來發生咩事?大家拭目以待啦!


如果喜歡我們的文章,請即分享到︰

留言


請按此登錄後留言。未成為會員? 立即註冊
  • L Lo Pang 於 15/06/2017 評論 NO. 1

    文迪穌傑

  • Chris0321 於 15/06/2017 評論 NO. 2

    哈利堅尼

  • Hola Konichiwa 於 15/06/2017 評論 NO. 3


    達仔好快會發現: 啲隊友交啲波咁差,我點入波.....

  • rickytct 於 15/06/2017 評論 NO. 4

    坦白講,我都覺得佢唔差過基沙文,不過講即食程度,一定係基沙文

快捷鍵:←
快捷鍵:→