曼聯專區小評:英軍神鋒韋碧克!

曼聯專區 於 08/09/2013 發表 收藏文章
韋碧克,網民戲稱「韋逼甩」,事關佢一逼就甩;而且門前失機情況嚴重、身為鋒線一員入波數字竟然比唔上維迪,經常被曼聯球迷詬病…不過呢個絕對係一個假象,因為佢返到英格蘭國家隊就立即變身入波機器,入波源源不絕,對摩爾多瓦一仗就已經梅開二度,近7次代表英格蘭出戰攻入6球,稱其為一流射手絕不為過。

睇數據,自去年6月2日小克攻入國家隊首個入波之後,15個月內佢已經為國家隊攻入8球,同一個時段入面佢喺曼聯只攻入4個粒,仲要一半都係今季的比賽先入到。究竟佢係咩構造?在紅魔的比賽打唔起又點解?

一切要由爵爺的調動開始,其實韋碧克曾經一季入12球,是與小豆並駕齊驅的鋒線人員,只係因為雲佩斯的成魔,碧克哥只可以放棄打前一格,被放到中場位置。其實佢都算係萬能中前場老倌,無論在曼聯、英格蘭都係要滿場飛,好似對摩爾多瓦,英格蘭左路有缺佢就去咗左路打。當然唔可以排除一個原因,楊格好、拜恩斯都好,對住摩爾多瓦都可以一人打哂一邊,咁就解釋到韋碧克其實同打左前鋒無咩分別,可以放心攻前,打咗左邊之後仍然入到兩球的原因。與身在曼聯相比,韋碧克真係近龍門好多,機會多啲亦好正常。

而睇上仗國家隊比賽,韋碧克的one touch、接應隊友傳送的能力較弱,不過突破力就唔細,兩個入波都係單刀,兩次林伯的助攻造就佢嘅突破。面對龍門顯得冷靜,射門有板有眼。呢個亦顯示出風格問題:英超節奏真係太快,其實對球員的one touch能力要求好高,如果攞波攞得稍稍離腳,對手已經會蜂擁而上。呢個風格對唔擅長攞波的韋碧克而言壓力好大,常常甩波就係因為佢攞波時的反應唔夠快、決斷力亦稍有不足。不過以佢嘅速度,絕對係突破對手防線的一把尖刀。

而佢嘅努力其實大家都有目共睹,有熱情、有心態,筆者認為只要佢可以練好啲攞波、同如何保護腳下球的技巧,佢好有機會可以成為曼聯的另一位好前鋒!

如果喜歡我們的文章,請即分享到︰

標籤: 曼聯專區小評  韋碧克  

留言


請按此登錄後留言。未成為會員? 立即註冊
  • vv11716 於 11/09/2013 評論 NO. 1

    清醒D啦 對摩耳多亚呢D魚腩入兩球 1

  • vv11716 於 11/09/2013 評論 NO. 2

    清醒吧你们 韋碧係廢嫁 他遲多1至2年會比曼聯賣去維拉 纽卡素呢D球会

快捷鍵:←
快捷鍵:→