曼聯專區小評:紅魔猶如昨天的阿仙奴

曼聯專區 於 03/12/2018 發表 收藏文章
英超進入小快車期,周中曼聯將會出戰阿仙奴。先唔理曼聯自己嘅問題,有睇北倫敦打吡嘅球迷應該會好驚驚:阿仙奴喺艾美利帶領之下一洗往日頹風,與熱刺對攻快上快落,速度同爽快感不在話下,更令人難以忘懷嘅係球員嘅精神面貌。熱刺入第二球嘅時候忘形慶祝,一眾阿仙奴球員當昤表現出嘅係火滾、不滿,尚未出場嘅後備兵藍斯更差啲同對手大打出手。而之後絕不放軟手腳,對住強隊一樣要搏兔式入多2球,呢一種霸氣同熱情,正正係曼聯依家欠缺嘅。

加利仔講返呢場波嘅時候,簡直係指桑罵槐:「過去幾年阿仙奴嘅問題一洗而空。之前你嚟到呢度,你唔會有期望,你感覺人人都悶悶不樂。我多年來都好討厭嚟酋長球場,因為呢度嘅負面氣氛同埋無情感,絕不配襯呢隊偉大嘅球隊。」無錯,依家曼聯咪就係咁死氣沉沉,無嗰種打破僵局嘅熱血同動力?

呢番新氣象喺呢場打吡表現到極致,而加利仔認為艾美利心中藍圖清晰,要達成目的就要有所犧牲,將唔啱用嘅人踢出計劃:「奧斯爾連參與的空間都無。單獨睇個人能力,奧斯爾直情夠打入世界盃決賽,但對於艾美利嘅勝利藍圖佢就係格格不入。艾美利要求嘅係一套隊內文化嘅改變,一個心理上嘅根本改革,由中後場開始以超凡機動力灌注整個球場,但奧斯爾並無其他阿仙奴球員嘅壓逼能力,所以佢無得上陣。」

摩連奴嘅諗法,悲劇地同艾美利一樣「哲學至上」,但精神面貌就流於「保住控球權」,唔會作出任何冒險嘅行為。所以佢寧願死都要出馬迪,有馬達都照用費蘭尼,目的只有一個,就係要控制中後場,前面暫且不理。英超主攻嘅球隊好似阿仙奴、曼城、車路士,全部都容許球員冒下風險,俾佢哋發揮創造力向前傳送,後踭好怪腳好,又或者擅用所謂「一腳波」,波到腳到絕不停留,冒上失去控球權嘅風險去拉空對手。但摩連奴嘅戰術,就係要控波在腳,交波都寧要大腳,唔希望中場被攔截,再俾對手反擊機會。

戰術或者你已經聽到悶,但足球係咩諸君應該心中有底。利物浦幸運球絕殺,高普開心到喪跑;盧卡斯托拉拿為阿仙奴入波開心到除衫鏟草,嗰種純粹嘅激情同喜悅係無得呃人。相比起上嚟,絕殺年青人時摩連奴怒摔水架,可能行為上差不多,但當中嘅情緒又係唔係一樣呢?呢一摔,有無怨懟?有無不滿?有無對球員嘅指責?會唔會感染到球員,令原本差嘅士氣更差?

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • kcc98
    kcc98 於 04/12/2018 評論 NO. 1

    筆者已道出問題所在,其實曼聯需要就係換教鍊, 正如雲加一走整隊亞仙奴就充滿斗心,爭勝之心.........

  • Frozen Leung
    Frozen Leung 於 04/12/2018 評論 NO. 2

    挑,摩連奴未黎果陣就話摩連奴先係最適合教曼聯、

  • Frozen Leung
    Frozen Leung 於 04/12/2018 評論 NO. 3

    無錯呀,係好適合呀,曼聯無錢收買球證就係得咁既實力

快捷鍵:←
快捷鍵:→