曼聯專區小評:紅魔不值贏聖徒

曼聯專區 於 10/12/2014 發表 收藏文章
大家都係曼迷、愛隊一樣,筆者其實都好明白,不過有時錯就要認,打就要企定,上仗對修咸頓打成點,大家都有眼睇。而最重要嘅兩個問題,係曼聯有必要好好改善,單單依靠運氣,真係盞搞…

第一單,中場的起色原來只係虛火…對阿仙奴時,曼聯中場有啲火、又有啲積極,都叫做交到下貨。呢場波相比之下,可謂非常失色:曼聯控球率48.1%,修咸頓51.9%,輸;曼聯全場射門3次,修咸頓高達15次,又輸;曼聯中龍2次、對手4次,都係輸;曼聯傳波478次,「聖徒」510次,亦輸。03年以來,曼聯真係難得有場波射門咁少,2005年對利物浦得5腳攻門原來未係最少…不過最慘烈的真係要計中場,射門、入球、助攻、關鍵傳送、傳中成功率、攔截5項關鍵數據上,馬達、費蘭尼都錄得數字為:「零」。
今仗曼聯打疑似352陣式,但係對方的翼鋒球員沙迪奧文尼、朗治對我哋嘅翼衛楊格同華倫西亞完全無興趣,成日cut入去打中路,所以兩位曼聯翼衛有好多空位可以走動同俾波先啱…結果係,佢哋都幫唔到馬達同費蘭尼,而兩位中場水準以下的表現亦是曼聯供應不足、進攻不暢的原因之一。中場點搞?真係要諗諗…

另一個大問題,係後衛。不過唔單止係經驗同水準麻麻,就連可以好好練返嚟嘅默契同溝通都出咗事,呢個先係最大的問題。打返3後衛一眾曼聯後衛又周身唔聚財,而麥拿亞今仗又打得唔係幾好,係一個計時炸彈,於是39分就被換走,由靴里拉入替。不過呢個調動對場上各人而言應該係幾出乎意料,就連卡域克都唔知自己要點做,向入替的靴里拉大叫、又對住後備席揮哂手,因為佢都唔知自己應該要留在中場,定係代替麥拿亞打後衛。然後抽獎就抽咗3-1-4-2出嚟,卡域克真係要打後一格,不過淨係搞清楚都浪費咗一啲時間。而繼續用3後衛,其實一眾球員都仲係周身唔聚財,搞唔清權責、做唔到分工,對手一衝,即刻散哂。如果唔係夠運,真係輸波都唔奇…

所以呢,愛隊還愛隊,有問題都係要鬧…呢個表現絕唔可以在聖誕快車出現,如果唔係失分就會好似開水喉咁快…真正的考驗要開始了,大家準備好坐過山車未?
https://www.youtube.com/watch?v=t7-U8Mk-ofQ又睇多次入波同精華啦!贏波都係開心嘅!
標籤: 曼聯專區小評  

留言


請按此登錄後留言。未成為會員? 立即註冊
  • saltfish 於 11/12/2014 評論 NO. 1

    點解咁多人討論曼聯的,無論贏輸都咁多人講。其實好多球隊有時都贏波靠運啦。都唔知啲反曼迷有咩好講

  • mc4713 於 11/12/2014 評論 NO. 2

    年輕人,你不知道好波不如好運嗎

快捷鍵:←
快捷鍵:→