曼聯專區小評：盧卡古，拜託你再打好啲… 精選

敗也魔獸，成是否都關魔獸事？對陣熱刺、白禮頓，盧卡古都有浪費大好機會嘅前科；而對般尼一役雖有2球進帳成贏波功臣，但下半場幾次接應隊友獨到長傳半單刀都係入唔到波。每當佢單人匹馬在前場拎到控球權，曼聯球迷都只能嘆一口氣，因為被化解攻勢嘅可能性都唔細…睇數字，其實真係有少少令人不快。

上場比賽盧卡古已經追到「前輩」杜奧巴於英超嘅入波數字，即係104球；但係「真．魔獸」杜奧巴在英超上陣254次，而把握唔到「黃金機會」錯失入球的次數只有13次。「小．魔獸」呢？224場上陣，已經有75次「食叉燒」失敗嘅經驗，把握力絕對係盧卡古要再努力嘅一環。
有比較，其實更顯盧卡古嘅失威。唔好提杜奧巴，只係提隊友已經好有「對比」。曼聯開季至今攻入6球，當中有一都係佢攻入嘅，其次就係普巴入2球同梳爾入1球，然後就沒有然後了；利物浦呢？文尼、沙拿、法明奴，仲有史杜列治人人有波入；曼城更有7位球員入過波。既然曼聯識入波嘅球員唔多，唔多唔少都將入波責任推哂俾盧卡古，於是有咩錯就放得更大。同樣，既然曼聯無咩球員有大威脅俾到對手，要防守佢哋亦變相簡單好多：只要全力封殺盧卡古就已斷紅魔一臂。

呢一刻，山神已經開始捉到「助攻」嘅節奏，但係搵入波機會仲要啲時間；連加特、福仔又似乎都係駁腳多，所以入波始終都係要靠唔算好有效率嘅盧卡古。唯一令人有希望嘅，係佢仲係好後生，而且都算係好肯進步同改善嘅一位球員。25歲仔，仲有時間俾佢精進埋門質素；同時佢嘅學習態度其實唔算差，喺愛華頓佢曾經俾人批評無做hold up，無控球在腳等隊友上前支援再多角度進攻；到上年亨利已經大讚佢進步唔少，多咗助攻同埋團隊合作。當然進步空間仲有，佢嘅控波能力、埋門嘅決定都仲可以改善；而hold up play其實都仲係水平之下。硬米煮硬飯嘅情況下，作為曼聯球迷當然要支持佢，希望盧卡古可以有更大進步，再「渣古」啲撞散對手球員，入多啲波！