曼聯專區小評:爆炸頭唔守得?

曼聯專區 於 03/12/2014 發表 收藏文章
對完史篤城之後,大家應該對費蘭尼的新位置有啲眉目喇!講啲比賽情況先啦,上半場比賽可以話成也費蘭尼、敗也費蘭尼,接應靴里拉傳送攻入第一球的係佢;不過被對手侵犯倒地、造成空位俾對手扳平的都係佢。比賽中幾個畫面都睇得出,佢有嘅係身體抗性、準確嘅入楔同制空力;欠缺嘅係控球能力、同埋有時傻傻哋,作出的判斷唔太準確。究竟佢係一個點樣嘅球員?筆者會形容為「矛盾存在」!

上賽季莫耶斯執教時,總係唔知點用費蘭尼好。佢成日安插爆炸頭打防中,結果就係好多時俾人力爆,防守意識不強、傳送能力又唔係幾好,好似為後防帶來唔少炸彈咁。不過打前面呢?好似又無咩攻力,因為控球唔好、成日斷纜,又令對手多好多反擊機會。咁就大件事喇,攻又唔得守又唔得,打咩先得?

其實爆炸頭嘅弱點今季仍然未有改善,單睇呢場波,佢嘅失誤引致失波之前,已經出現過兩次較嚴重的錯誤,失去控球權:2次回傳史摩寧、靴里拉都被截到被打反擊,而且久唔久有啲失波甩波,其實算係粗枝大葉咗啲。不過,點解佢又可以在雲帥手下打出水準之上?原因係,在佈陣方面雲帥盡量遮掩佢嘅弱點,把他的長處表現多啲。好似下半場咁,馬達明顯後撤一格,分擔費蘭尼的防務,佢立即在禁區出現多咗,威脅都多咗。而呢個決定,就係因為爆炸頭守得不穩。

呢一個,就係一種「中場共生」的關係:曼聯的中場人腳入面,技術型的大有人在,不過好多都係身型單薄、唔撞得。費蘭尼就撞得,不過腳法麻麻,會有甩漏。於是佢拍住靴里拉、馬達就可以互補長短,你唔夠人哋撞時我來幫手撞;我唔夠人扭被截波時,你來支援。而曼聯中場的穩定性,亦因為有咗呢位「掗掗拃拃」嘅中場球員而變得好咗,唔會過於偏重技術型中場而失去硬朗風格。不過,作為「矛盾存在」,撞得嘅佢又真係唔適合打防中,只可以打前一格做以「半攻中」姿態示人…

結論係,曼聯真係要一位硬淨中場支援一班技術型中場,依家可以用住費蘭尼先,如果真係好似外間傳言,有史杜特文這種硬漢最終加盟,佢又可能再一次被邊緣化…爆炸頭,你都係時候搵下有無計,再進步多啲喇!唔係就真係好危架喇…
一睇就知佢唔撞得啦...

如果喜歡我們的文章,請即分享到︰

標籤: 費蘭尼  

留言

會員
我要評論
請按此登錄後留言。未成為會員? 立即註冊
  • kokeu
    kokeu 於 03/12/2014 評論 NO. 1

    geli

  • lurk
    lurk 於 03/12/2014 評論 NO. 2

    同意

  • Hingcowc
    Hingcowc 於 03/12/2014 評論 NO. 3

    係守得,不過啲交波真係麻麻

快捷鍵:←
快捷鍵:→