曼聯專區小評:最後10分鐘失分最痛

曼聯專區 於 06/12/2016 發表 收藏文章
對愛華頓一役唔算打得好,不過最少都入球在先,本來如履薄冰就可以保住3分,唔駛又和一場。不過最終費蘭尼為對方搏得嘅12碼,令曼聯再失2分。

現況就係,曼聯喺比賽最後十分鐘所失嘅入球已經令佢哋嚴重失分,計計埋埋已經無咗9分咁多。邊幾場波?9月對屈福特的比賽原本1:1打成平手,不過最終83分鐘、90分鐘被連入2球,最終輸波而回。10月初對史篤城,呢場比賽撳住對手嚟攻不在話下,而馬迪爾的入波令曼聯領先。最後?最後咪82分鐘畀人追和,失波之後後備上陣的迪比可以講係毫無建樹。第3場,11月19日對阿仙奴,馬達下半場先開紀錄,但係挨到89分鐘就畀「銀河唯一」基奧特扳平。呢球雖然係拉舒福特睇漏,不過又係摩帥選擇嘅換人:舒拉達連入替馬達,希望守和之後出現咗錯漏。對愛華頓?唔講喇,大家歷歷在目。呢4場最終無咗9分,如果可以全取呢9分,同榜首距離就會縮窄至4分!

原因,點都要搵下。其實呢4場波入面,3場比賽都係緊接周中另一場比賽進行,好似愛華頓一戰就係聯賽盃對完韋斯咸大炒對手;屈福特一戰係剛剛與飛燕諾爭戰;對史篤城之前亦係歐霸比賽。所以應付多條戰線令球員疲憊係原因之一,而另一方面亦顯示出曼聯於換人一環的嚴重缺失。每一次摩連奴換入嘅球員,好似對戰局都無咩幫助,反而令球隊要面對更多不穩定因素。好似對阿仙奴換入舒拉達連好似係希望加強中場的截擊與防守力,不過偏偏就令中後防產生空檔被對手有機可乘;而對拖肥換入費蘭尼表面上亦可以加強球隊的硬淨度,挨過最後的一段時間。先唔好講佢嘅「12碼」,就算佢無犯天條都好,後備出場之後佢嘅表現簡直可以用慘不忍睹形容,傳送失誤、隊友二傳又無法接應,人腳上猶如打少一個。他的狀態如此摩帥不可能睇漏,只係佢嗰個時候要換一個有如斯功用的球員,亦只得爆炸頭一個可揀。唔換人咩?見到球場上球員人人疲憊,唔係真係唔換呀化?

其實就連摩帥,佢嘅運仔都係麻麻,計佢入主英超的首196場賽事,平均一場拎2.29分,羸夠136場,勝率有成69%。但係到最近的30場,已經銳跌到30%,只係得9場勝仗,平均一場得1.2分。佢嘅領軍能力大家都有信心,唯一可以挑剔嘅就係佢尚未係非常了解曼聯嘅情況,令換人呢一著未係「最佳化」之外,佢同曼聯呢幾個月都無咩運仔啦。

其實呢一點,曼聯高層都睇得到。比起前幾季,曼聯其實已經改頭換面,攻擊力大大改善,只係戰果未能完全反映。而《天空體育》就由曼聯高層到收到消息,指一眾高層對於今季曼聯的精神面貌其實幾滿意,比起上年好好多咁話。而據稱成績喺高層眼中唔係最重要一環,風格先係最重要。只要摩帥繼續沿呢個「全攻型曼聯」方針治軍,佢好有可能被委以重任,繼續做「魔頭」做落去。所以,依家摩帥首先就係要諗諗一月有無計仔,為呢隊「容易疲累的曼聯」加入一啲後備軍,加強球隊韌力;另一方面就要睇下幸運女神嬲完我哋未喇……

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • lurk
    lurk 於 06/12/2016 評論 NO. 1

    舒拉達連真係咁差?

  • Edwin Tung
    Edwin Tung 於 06/12/2016 評論 NO. 2

    不解釋

  • Tony Chan
    Tony Chan 於 06/12/2016 評論 NO. 3

    咁講真今季大部分比賽起碼都大半場波㩒住人砌而唔係㩒住人搓

  • Benny Wong
    Benny Wong 於 06/12/2016 評論 NO. 4

    捉鬼好過啦

  • KaiTai Wong
    KaiTai Wong 於 06/12/2016 評論 NO. 5

    C9吾差……只係上季比雲高爾雪到硬哂……

  • Bill Chan
    Bill Chan 於 06/12/2016 評論 NO. 6

    最大問題係贏一球就唔攻諗住穩守,但呢條後防做唔到穩守

  • Davis Leung
    Davis Leung 於 06/12/2016 評論 NO. 7

    仲賴運氣?醒下啦,隊波係有問題,週中打完聯賽盃,星期日場波得2個變動,去到尾段仲邊有氣力迫搶?打個盃仔都狂出主力,又唔輪換,真係當個個鐵人?

  • Kiff Cheung
    Kiff Cheung 於 07/12/2016 評論 NO. 8

    硬係差埋門果腳, 入到2球就穩陣好多

快捷鍵:←
快捷鍵:→