曼聯專區小評：曼市雙雄爭標5大關鍵要點! 精選

艾夫拿之前就話曼城想追過曼聯，無咩可能呀喇...當然各位曼迷都希望係咁呀喇，之不過有過上季教訓，加上依家仲有成16輪聯賽未打，都未可以話肯定贏硬。筆者就曼聯曼城兩隊作出分析，提出兩隊爭奪英超冠軍嘅5大關鍵因素。

1. 心理素質——雙方分差將會係縮減 / 保持 / 擴大差距?

曼聯同曼城晌啱啱過去嘅一周都過咗一關，曼聯晌「雙紅會」勝出，而曼城亦晌對阿仙奴中贏波而回，攞到佢哋自1975年以嚟第一次晌阿仙奴主場全取3分，保持7分差距。曼城餘下賽事每一場當然都不容有失，而晌後追角度上，如果次序上曼聯打先，對佢哋稍後出戰嘅壓力會更大，曼聯贏的話而佢哋輸，就有機會落後10分。當然曼聯係後打嘅一隊都一樣，曼城先贏，曼聯後場有咩失分，再加上「曼市打吡」次回合未打，隨時優勢盡失。今周就正正係曼城周六先對富咸，曼聯周日先對熱刺。所以餘下賽事，好睇壓後亮相嘅一隊心理素質，佢哋會點承受壓力。另外，曼聯及後亦有可能因參戰歐聯而分心，影響球隊晌聯賽嘅表現。
2. 中場——曼城有耶耶托尼出戰非洲國家盃，曼聯翼鋒亦輪住受傷，邊隊影響較大?

耶耶托尼現時代表緊國家隊出戰非洲國家盃，對曼城嚟講，佢嘅角色非常重要，未離隊之前22輪聯賽全部正選上陣，晌隊中助守之餘，又有後上入球能力，上屆科特迪瓦打到入非洲國家盃決賽，令佢缺陣近1個月，當時曼城相繼晌足總盃、聯賽盃出局，聯賽又輸咗俾愛華頓。只要今年科特迪瓦再打入決賽，咁耶耶托尼又需再缺陣6個禮拜，曼城可唔可以晌無佢嘅時間保持到一定表現，或者有無人代替到佢晌球隊嘅角色，絕對係關鍵。

至於曼聯方面，曼迷一定知曼聯戰術上多靠兩邊出波，所以翼鋒對曼聯嚟講都非常重要，之不過曼聯幾名翼鋒輪住受傷，華倫西亞同艾殊利楊格分別今季只出場14及13場，但後者又晌「雙紅會」一戰中又受傷。當然仲有蘭尼，佢都因傷而只係比賽咗4場，至於傑斯因年老早已經移入中路，令費SIR有時要將香川真司 / 韋碧克放晌邊路，可惜唔係純翼鋒出身嘅佢哋，較少有高質素出波。因此呢幾名翼鋒晌餘下比賽能唔能夠健健康康出戰餘下賽事，都曼聯都有好大影響。

3. 後防——曼城中堅位置缺人，曼聯防守要再加改善

曼城啱啱晌對阿仙奴一戰有隊長甘賓尼領紅，如果上訴唔成功，佢就需要停賽三場，而高路托尼又去咗出戰非洲國家盃，令曼城之後幾戰中堅得番拿斯錫迪、尼史葛同外借荷甲而被召回嘅保耶達可用。甘賓尼一直係曼城後防支柱，拿斯錫迪唔係好俾到人信心，尼史葛今季因傷而上陣機會較少，所以末來幾戰曼城後防頂唔頂得住唔失分，亦係關鍵因素。

曼聯方面唔洗多講大家都知，曼聯今年後防一直都係問題，當然亦有可能因為後防球員輪住傷，到依家都無奠定一個穩固嘅後防4名球員，建立唔到點契，之但係後防的確需要改善，希望晌傷兵陸陸續續傷癒後出後，有足夠兵源下，可以令費SIR搵得番今季最佳後防組合。
4. 前線——阿古路傷癒後前線表現會係點? 曼聯要確保雲佩斯全季都無傷病

阿古路韌帶撕裂，仍需要一段時間先復出，但佢晌場上同泰維斯嘅合拍同走位，的確係曼城前線一大殺著。雖然依家迪斯高狀態好好，係球隊首席射手，但大家都知晌文仙尼比較用人唯親，晌佢心目中「阿根廷」孖寶先係佢前線首選，只要阿古路好番，迪斯高相信唔理狀態係點，都會坐回後備席，所以要睇睇阿古路復出後入球能力及狀態回復成點，能唔能夠同拍擋晌前線繼續取得入球。
至於曼聯方面，前線最關鍵人物一定係雲佩斯。雲佩斯之前效力阿仙奴時經常傷出，到上季開始至今先同傷病遠離，曼聯的的確確要好好確保雲佩斯無病無痛，事關佢對曼聯晌前線入波真係真係真係好重要。

5. 「曼市打比」次回合——曼城作客奧脫福表現係點?

「曼市打比」會晌4月30日上演次回合賽事，上季曼聯晌主場輸1-6，對曼城今年出戰一定有打咗支強心針嘅作用，再加上對戰前雙方分差唔知係點，文仙尼更講到明只要當時得4-5分差距，就一定可以後上，所以無論點曼城戰意必定高昂。曼聯方面，啱啱有數據指曼聯主場半場領先，就29年未輸過，如果紅魔守住半場領先，贏面會較大。