曼聯專區小評:我們都需要小豬

曼聯專區 於 02/11/2016 發表 收藏文章
當大家再見到小豬在訓練場現身,唔少人都表現得非常雀躍,朗尼即post 2人合照、梳爾話見到佢真好,其實好多好多人都希望再睇到呢位德藉大將的英姿。呢一刻尚未知摩連奴叫佢返一隊操練有何用意,至少唔確定摩帥畀佢出陣聯賽的意欲有幾強。只係,睇返2個人呢半年以來的態度,就知道加入舒韋恩史迪加絕對係摩連奴值得一搏嘅一著。

先唔好睇小豬,我哋睇摩連奴。印象中,「狂人」係寸咀、係傲慢到一個點,講嘢去到盡、但係佢嘅冷笑、恐怖嘅眼神,再加上咩場合都泰然自若、談笑風生,全部都係佢嘅招牌。不過,呢個招牌只可以講係十年前車路士陣中先可以見到。過咗10年,依家嘅摩佬好似老了30歲一樣,加入曼聯時影嘅相無張有笑容;白髮多咗唔少,但係幫唔到佢變得有型,反而有種落泊同滄桑。叫囂同挑戰球證係有嘅,不過已經唔係當年魅力十足、霸氣無比嘅挑戰,反而好似老人家有氣無力嘅叫罵。可能佢喺皇馬成日都要大戰管理層,又可能因為回歸車路士磨蝕咗佢嘅精神,總之就係令呢位狂人睇落魄力、心力都無之前咁足夠。嗰種硬係差啲嘅感覺,其實同依家曼聯的精神層面好相似,尤其係諗返起對般尼一戰,大家都好努力、好畀心機,不過好似就係差啲運仔,差啲突破。其實佢都唔係年紀大,只係大過高普4年、大過干地6年,只要轉換一下心情、諗法,只要唔好再苦口苦面,可能對於成隊球隊都會有正面影響。

反之,大家睇睇小豬,一開季摩連奴就已經話佢無咩可能為曼聯再上陣,不過佢先係話自己唔會再效力另一隊歐洲球隊,之後一直都表現正面,一個人訓練又好、一個人睇波又好,都表現出佢唔放棄的正面態度。佢係最有權去呻自己被不公平對待嘅人,不過拜仁慕尼黑主席路明尼加出聲罵摩連奴、紐亞罵摩連奴、好多好多其他人開口怨懟嘅時候,小豬都係以一句:「我享受依家嘅生活,你呢?」來應對。

不能否認,一眾曼聯球員依家一定有啲忐忑不安,因為有摩帥加盟、有伊巴普巴呢啲新將在陣,球隊都未係好順暢。再加上般尼一仗,前線幾位球員的合作越來越順,不過連一球都入唔到,對於士氣點都有啲隱憂。當然,最大的不穩定因素喺摩連奴身上,佢嘅負面都寫哂喺額頭上面,影響到一班球員一啲都唔奇。所以呢一刻,舒韋恩史迪加以不死精神打出一條血路回歸一隊訓練,即使佢最終都無法上陣英超,佢喺訓練場為球員帶來的正能量確係曼聯依家非常需要嘅。領袖,有時只要出嚟行一個圈就已經可以有提振士氣嘅效果。所以,呢一刻即使唔知小豬回到訓練場代表咩,佢已經為球隊氣氛帶嚟一啲改變係肯定嘅,而筆者當然希望係正面影響啦!

搵唔搵到小豬呀大家?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • postman
    postman 於 02/11/2016 評論 NO. 1

    小豬對曼聯的心,好過好多隊中球員。加油!

  • Terry Chan
    Terry Chan 於 02/11/2016 評論 NO. 2

    原來操起佢只是為了冬天賣好價錢

  • Victor Man
    Victor Man 於 02/11/2016 評論 NO. 3

    摩佬夏天已經比晒機會小豬走,甚至有報導話搵埋offer比佢,係佢自己賴死唔走,雪佢唔用佢根本大條道理,咩不公平對待?養傷期間周圍走去睇女友打波,引起隊友不滿,又係咪正面影響?郁啲就咩不死精神,同新浪啲飛機文冇分別。利申曼迷但唔撐佢,每個禮拜練下波就廿幾萬週薪比我都享受。

    http://www.dailymail.co.uk/sport/football/article-3757052/Manchester-United-stars-told-Bastian-Schweinsteiger-stop-watching-wife-Ana-Ivanovic-play-tennis-work-fitness-cast-out.html

  • Fan Lau
    Fan Lau 於 02/11/2016 評論 NO. 4

    希望小豬能出場打爭氣波

  • Estyip
    Estyip 於 03/11/2016 評論 NO. 5

    嘜佢之前有得同一隊D人訓練咩?

快捷鍵:←
快捷鍵:→