曼聯專區小評：從數字睇費蘭尼同卡華利唔夾？ 精選

打波同食藥一樣，最緊要夾！不過，星期日嘅比賽入面，曼聯嘅中場配搭好似真係唔係幾夾…講緊嘅，係費蘭尼同卡華利嘅組合。究竟呢兩粒星夾唔夾？如果只睇比賽數據，答案睇嚟係：麻麻…筆者就將佢哋嘅比賽數據同大家分析一下：

單睇傳波成功率，兩位球員同場時唔知係唔係無咩默契，定係互相干擾，傳波的準繩度都有下降，好似平時有89%準繩度嘅卡華利，今仗只有81%。而平時88%交準波嘅費蘭尼，都只得83%。呢個都唔係最大問題，最大問題係位於對手的半場範圍內，二人交失波的數字大增，原本卡華利平均有85.6%交到波，今仗只有68.4%；費蘭尼就由85.3%降到70.8%。而咁就解釋到，佢哋兩個連一次埋門機會都製造唔到嘅原因。

講到攔截，二人都做得無平時咁好，卡華利甚至一個攔截都無。費蘭尼好啲，有4個攔截1個成功，不過都差過佢平時嘅數據。以下係佢哋同其他英超球隊上一場比賽的數據比較：

謝拉特 / 盧卡斯
傳波：98次 對手半場傳波成功率：73.55% 製造攻門機會：3次

林伯特 / 拉美利斯
傳波：101次 對手半場傳波成功率：73.75% 製造攻門機會：4次

韋舒亞 / 藍斯
傳波：119次 對手半場傳波成功率：82.7% 製造攻門機會：2次

托尼 / 費蘭甸奴
傳波：99次 對手半場傳波成功率：82.25% 製造攻門機會：4次
卡華利 / 費蘭尼
傳波：95次 對手半場傳波成功率：69.6% 製造攻門機會：0次

當然啦，單場比賽咁睇其實對兩位都唔公平，可能因為對手的緊逼、可能兩位無無狀態，二人係新隊友未有默契等等…好多原因都會影響。依家只可以祈求呢個係個別情況，二人夾多啲可能會好轉，如果唔係，卡域克一缺陣就真係無中場可用…