曼聯專區小評:年輕人得勢或阻「摩帥成魔」

曼聯專區 於 08/04/2016 發表 收藏文章
呢排曼聯的新聞少咗,摩連奴入主嘅消息又好似無之前咁強烈,好多人都認為主因係雲帥又有貴人,新將拉舒福特為曼聯攻入唔少關鍵入波,舒緩咗唔少雲帥的壓力。不過筆者就認為,摩帥入魔嘅消息之所以越見淡靜,好可能同依家嘅曼聯方針有關。

喺傾呢樣之前,我哋睇睇爵爺費格遜最近講咩:「普捷天奴真係無懈可擊。佢非常冷靜,你永遠見唔到佢發脾氣,不過佢麾下球員正正就係反映緊佢背後工作嘅成果。英國足球最重要嘅係你陣中有幾多英國嘅後生仔在隊,喺用小將呢一方面普捷天奴唔會猶豫,佢知年輕球員嘅優勢喺邊:佢哋唔會忘本,會記得邊個畀過機會佢哋。而因為呢個情誼,小將們都會交足功課,唔會令普捷天奴失望。」無錯,呢一個就係點解唔少曼聯高層都喜歡普捷天奴的原因,因為佢同曼聯一向的方針好相近,由畢士比年代到92班,曼聯一直都係著重年輕球員嘅球隊,爵爺執教時92班當然無得彈,中後期以舊帶新嘅方針之下有經驗的球員好似卡域克、里奧同埋雲佩斯多咗機會,不過新將好似當年嘅韋碧克、依家嘅鍾斯、史摩寧、贊奴沙,通通都有份打。呢個,就係曼聯一眾高層最喜見嘅情況。

所以,先唔好理點行到今日呢一步,因為傷兵多又好、高價球員打唔出身價又好,雲帥麾下曼聯依家都係年輕人主導,儼然有畢士比、92班的影子。無名的拉舒福特打出身價,甚至慢慢成為球隊的攻擊核心,一方面當然係大家意想不到,不過以佢嘅穩定性同冷靜,又真係畀到大家信心。馬迪爾不在話下,佢嘅潛力應該係陣中最恐怖嘅一個。不過除咗佢哋,曼聯有更多出奇蛋喺雲帥手中出現:科素文沙對愛華頓一仗交出助攻,而且防守力亦出眾、精力旺盛又有速度,得到唔少球迷的喜愛;而表現出色的小將華利拿亦得到不少掌聲。數數手指,單係今年2月雲帥就已經帶來6個小紅魔的處子戰,而佢加盟至今已經起用了14個從未出現在一隊的小將。相比上嚟,數齊摩連奴整個教練生涯、咁多隊球隊都儲唔夠25個「處子戰」,反映佢喜歡買人多於試新人。如此一來,又進一步印證曼聯高層唔喜摩帥的原因,因為佢哋心目中都係認為,曼聯應該要用自家產品多於引入外來球員。

當然,呢個原因會唔會令雲帥可以做多兩年仲係未知之數,不過就令摩帥入魔呼聲更低。普捷天奴肯用新人,又打出成績,喺曼聯高層心中得分自然高啲;而繼承爵爺領軍精神嘅傑斯亦好合符呢個條件。家下新人得勢,球隊發展都側重喺馬迪爾、拉舒福特、連加特等等小將身上,風格上與摩帥亦有唔少出入。所以今夏會唔會見到摩帥入主?筆者自己其實唔太睇好…

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • kinfung
    kinfung 於 08/04/2016 評論 NO. 1

    on99,系因為d人傷撚曬所以佢先用小將咋,講到雲92好似大膽用小將感

  • Ksbon
    Ksbon 於 08/04/2016 評論 NO. 2

    好多人傷咩😂? 感覺上傷既好似得Ronney?

  • Ksbon
    Ksbon 於 08/04/2016 評論 NO. 3

    好多人傷咩😂? 感覺上傷既好似得Ronney?

  • Ksbon
    Ksbon 於 08/04/2016 評論 NO. 4

    好多人傷咩😂? 感覺上傷既好似得Ronney?

  • Tony Chiu
    Tony Chiu 於 08/04/2016 評論 NO. 5

    又唔會既,摩佬都鐘意用後生仔
    .
    .
    .
    .
    買返嚟個啲啫(馬達:..........)

  • Nelson Lee
    Nelson Lee 於 08/04/2016 評論 NO. 6

    摩佬嚟唔嚟我都唔想再見到方丈教曼聯。。。

  • 京治
    京治 於 08/04/2016 評論 NO. 7

    V92教成咁鬼樣下年又完約, 若果今季完咗嗰陣都唔換人嘅話, 曼聯真係等再見

  • Mimitony Tonyma
    Mimitony Tonyma 於 08/04/2016 評論 NO. 8

    傑斯帶隊吧!

  • 羅梓忠
    羅梓忠 於 08/04/2016 評論 NO. 9

    真心希望傑斯带队,但是真是要再等多几年。

  • Marvin Wong
    Marvin Wong 於 09/04/2016 評論 NO. 10

    其實上星期同愛華頓比賽前,高調表揚Sir Bobby 同改個看臺名,會唔會係叫這位老前輩收口的最大敬意,有無師兄同我一樣覺得是摩師來教的前奏?

  • FuNg Li
    FuNg Li 於 09/04/2016 評論 NO. 11

    其實到依家都未分到球員同教練係唔同,傑斯係好出色既球員,但教練係需要時間經驗眼光,傑斯踢波踢得好唔等於教得好,耶子走個陣,傑斯教雖然得幾場,但個幾場亦唔見有改善或踢得好,所以傑斯係呢個時候仲未夠班做領隊,當然之後既野係未知!若然傑斯做多幾年名師助教下,可以一試

  • rickytct
    rickytct 於 09/04/2016 評論 NO. 12

    回上面,即使傑斯做多幾年,d人一樣會講你而家呢一番說話

  • easonbella
    easonbella 於 09/04/2016 評論 NO. 13

    豪門唔係證明自己既地方,想係豪門做得有說服力,就要有勇氣出去闖,證明左自己先返,唔係球隊成績幾好大家都唔會覺得關佢事,好似斯丹咁

快捷鍵:←
快捷鍵:→