曼聯專區小評:四子連動!但好表現帶唔帶到落英超呢?

曼聯專區 於 25/11/2016 發表 收藏文章
4比0的比數為曼聯歐霸出線帶來好消息,羸波之後升上小組次席之餘,亦都大大增加得失球差。以家佢哋以2分力壓飛燕諾,但係得失球差去到9球!正6球進帳,而飛燕諾負3球,換言之最後一場對陣小組包尾的索爾亞只要乖乖哋唔好輸波已經九成出咗線。當然,贏埋就甚至有機會爭首名!

而呢場比賽入面,都有幾多嘢睇得到架!首先就係曼聯前線4子嘅互動,感覺到各人嘅默契越來越好。先唔好講米希達利恩,佢正式比賽唔多,同其他人夾嘅時間點都少啲。反而係伊巴、朗尼、馬達嘅默契,正正就係大敗飛燕諾其中一個原因。好似第一球入波,就係伊巴同朗尼的一場優雅之舞,先由朗尼左面邊路發難,橫傳予中場附近的伊巴,而對手忌憚伊巴嘅情況之下,畀朗尼入楔到禁區接應伊巴的妙傳起腳攻入。唔好忘記,仲有個馬達在右路竄擾,影響對手的守衛。
第2球呢?3個球員都有參與!情況同第一球差唔多,都係由伊巴助攻朗尼,當大家認為隊長會把握機會大腳攻門嘅時候(連佢嘅動作都話畀大家知佢想射門),但呢一切都係一個假動作,最後臨起腳一刻佢轉為橫傳畀後上嘅馬達輕鬆射入。由呢兩球就可以見到,如果畀到空間佢哋3個做組織,其實可以發揮嘅威力真係好恐怖,而呢個成為曼聯的主流攻擊模式亦可以期待。

至於米希達利恩呢?無出場咁耐,昨晚嘅表現可以講係水準之上,全場共6腳攻門之外,下半場時仲有一次單騎由自己半場帶波到對方娥眉月頂,面對對方4個守將嘅連環追截都可以突破到,最後逼到對手出超技術(竟然無罰波)。由此可見,佢上年德甲入波助攻都有雙位數絕對唔係浪得虛名。至於點解佢無咩機會呢?摩帥都有啲嘢講:「佢依家只需要將歐霸嘅表現放落去英超就可以。不過英超同歐洲賽好唔同,佢仲要行多一步。無可置疑,依家佢信心水平高咗,而今場表現亦令佢有信心可以出戰下場。不過英超比賽更為體力化、更具侵略性,呢2樣米希達利恩都有需要加強。但係只睇個人質素的話,你知我哋點解要買佢。佢有腳法、有智慧,而且好睇得透戰局。」

無錯,呢個就係另一個今場比賽要留意嘅嘢,就係英超同歐霸其實好唔同。前線幾位攻擊球員都唔稱得上快,朗尼、伊巴年紀一把,大家都無咩期待佢哋可以爆到幾多場;而馬達呢?一向都唔係以快見稱。米希達利恩未係好適應到英超,就算佢快都好都要啲時間先可以喺體力化嘅英超做到個人突破、以速度破壞對手防線嘅工作。所以今仗雖然可以大勝一場,筆者其實唔太睇好英超都可以做到呢個成績。單睇2者賽果,喺歐霸曼聯得失球比小組首名的費倫巴治仲多5球,而且已經取得主場3連勝;但係英超呢?其實最近奧脫福上演的英超比賽當中曼聯已經連和咗3場架喇…所以呢,如果星期日對陣韋斯咸嘅主場比賽可以延續信心,大勝一場,先可以係一支真正強心針,幫曼聯即將面對嘅聖誕檔期!
(謎之聲:其實講咁耐,筆者都係想講,不如英超重用馬迪爾、拉舒福特同埋連加特呢幾隻快馬啫!)
標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Hok Kam Yau
    Hok Kam Yau 於 25/11/2016 評論 NO. 1

  • Lo Chan
    Lo Chan 於 25/11/2016 評論 NO. 2

  • Shuk Wah Chan
    Shuk Wah Chan 於 25/11/2016 評論 NO. 3

    其實摩佬用邊個都比人話

  • Leung Kleung
    Leung Kleung 於 25/11/2016 評論 NO. 4

    從對史雲斯加呢場比賽都睇到棄用傳統翼鋒打出黎既組織都比較流暢同滲透性強 不過都係睇多幾場先講 暫時黎睇今場呢個組合確實打得唔錯 btw曼聯係對賽往績對另外兩隊都有優勢 就算同分都一定食住佢地

  • Allen Sung
    Allen Sung 於 25/11/2016 評論 NO. 5

    重點係馬達同卡域克

  • Kenny Ho
    Kenny Ho 於 25/11/2016 評論 NO. 6

  • Real Ho
    Real Ho 於 25/11/2016 評論 NO. 7

    費sir之後,曼聯威完一場,通常下場收皮

  • Cheuk Hang Yu
    Cheuk Hang Yu 於 25/11/2016 評論 NO. 8

  • 數據就是事實
    數據就是事實 於 26/11/2016 評論 NO. 9

    信我,唔會,回英超只會跣腳食紅,無身體接觸食黃,你下下越位對手下下唔越位,你禁區比人雙手禁低人跳起頂入,你到人禁區雙手禁低人跳起頂入被吹罸,永無12碼,別人好位置大量好射的吹罸罸球,你永遠只有少量不好位置難射的罸球,你被撞低無事,你無撞低人但人一訓低你食黃...可以數到2046,唔好幻想,曼只可以守住前7,等待前4 自己失手出事,然後曼如龜一樣一步步迫入前4...(但我知曼今季係冠軍既機會最大)

快捷鍵:←
快捷鍵:→