曼聯專區小評: 唔係能力問題,係情緒

曼聯專區 於 22/08/2018 發表 收藏文章
開季打咗2場波,曼聯又好似回到莫耶斯年代一樣,球迷無咩期望、球隊無咩起色、教練無咩心機。究竟錯喺邊?問題出現在哪?細睇之下,其實唔好話對外,唔好睇對手有幾勁,只係擺喺到曼聯已經唔係好企得穩。原因,是內在已經四面受敵。

有聽過球評家講過,現今球隊差異已經唔算好大,因為有現代化科學知識、有系統嘅操練方法。中小型球隊嘅球員能力已大大提升,比體能、比速度,其實同頂級球隊都可以鬥到尾。所以勝負關鍵,往往在於領隊指揮、戰術調動,同埋最最重要的,球員嘅心理質素同戰意。不過依家嘅曼聯,呢方面嘅表現可謂不合格。講質素,隊中有8個人係世界盃八強球隊嘅成員,實力無容置疑。單睇連加特,既係英軍前線嘅活力來源,亦提供一定創造力;普巴在法國隊打法簡潔直接,連繫中前場亦做咗好多功夫。但返到曼聯,似乎佢哋嘅表現都打咗個折扣,點解呢?你睇對上兩場比賽,就見到球員們各自為政,欠缺團隊感覺,亦感受唔到默契同合作。新球員已經唔多,呢一班骨幹球員已經夾咗一段長時間,上年仲要拎埋第2,好明顯問題唔係在於默契、唔係在於質素,係在於士氣同情感。

主帥摩連奴嘅指導,唔多唔少令球隊出現負面情緒。隊中呢排出現好多炸彈,但似乎摩帥係引爆多過拆解。馬迪爾原本已經打得唔開心,因為伴侶誕下兒子而離隊原本係開心事,亦係一個好機會緩和雙方情緒,但最後卻因為種種原因,令2人關係更差。再睇艾活華,實力上與大衛基爾已經差一截,你見佢過去幾年買人步步碰釘就知。摩帥不滿,但唔選擇閉門解決,而係公開指責,亦唔見得係最佳選擇。有人話笑係可以傳染,負面情緒一樣都可以,依家曼聯嘅不快同埋士氣低落,既有漫延趨勢,亦令球隊表現更低迷,場內場外都好,無咩正面動力撥亂反正。

除此之外,戰術嘅落後都係曼聯依家嘅重心問題。泊大巴、防守至上唔係問題,守完點攻先係重點。車路士時代的藍色大巴,有洛賓、杜奧巴等人策動反擊;但細睇依家嘅盧卡古、山齊士,差唔多嘅模式,差唔多嘅手法,被人看穿已是預計之中。最令人氣結係,球隊落後就改以費蘭尼頭槌高空戰術,「套路」可說是少之又少。相比起曼城、利物浦以流麗順暢嘅推進拉散對手防線,依家曼聯確係有啲步履為艱嘅感覺。

球隊表現不佳,摩連奴當然責無旁貸,但始終球員先係落場踢波,佢哋亦有責任去改變情況。摩連奴嘅負能量確係好強,亦無咩可能改變佢;所以依家球員唯一可以做就係自己改變心態,由自己身上搵突破點。早前筆者講過,好似中場彭拿利、普巴、費特嘅三角陣式其實值得期待;山齊士、福仔同盧卡古亦有唔同風格,協調得到其實威力絕對唔細。球員自己搵出生路,搵到球隊美好嘅一面,慢慢擴大同發展,先有機會重回勝軌。大家俾少少耐性,睇下佢哋生唔生性啦!

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Yong Yuhan
    Yong Yuhan 於 23/08/2018 評論 NO. 1

    认同,摩佬成日同媒体纠缠,搞到D负面新闻系甘传,成日被人针对。好心专心响球场上啦话

  • Parco Chau
    Parco Chau 於 23/08/2018 評論 NO. 2

    唔撚踢4~4~2咪咁撚衰

  • @michael@
    @michael@ 於 23/08/2018 評論 NO. 3

    主因改變了基本模式,由主攻變防反,但睇返每個球員之前都不是這性格,所以不能得心應手。

快捷鍵:←
快捷鍵:→