曼聯專區小評：名宿評曼聯為「紅大巴」？真的嗎？ 精選

誠然，控球得31%、攻門得3腳，更只有1腳中龍係絕對難以擊敗19射、全盤控制戰局嘅曼城。過埋今場，曼聯已經達24場不敗，只不過殺入前四就變得被動，因為仲有幾場硬仗未打。只能夠話，13場和波令曼聯失分太多了。

各路英雄賽後都認為曼聯太過保守，亨利就話成季曼聯問題都係出喺唔識入波：「佢哋只係識防守，不過忘記咗守完之後要攻。之後去到白鹿徑，曼聯可以拎到一分已經係好好嘅結果，只係呢個結果對佢哋而言真係唔多夠。」林伯都有同樣嘅見解：「曼聯根本係為一分而戰。佢哋直接唔想消耗多一分力量去進攻，馬迪爾打到似左閘多啲。睇睇個聯賽榜你就明白佢哋點解咁打，因為佢哋咁打的話就前四有望。」

就連加利仔都唔太幫摩帥手：「我認為摩連奴會講，(第一步防守做得好)，第二步就係入波。佢曾經打造車路士成為強韌、堅固嘅隊伍，有打不死嘅精神；而24場不敗亦係一個無可否定嘅成就。只係下一步呢？下一步係要贏，但係依家睇嚟似乎仲有一段距離。」

咁樣講，係唔係對曼聯唔公平呢？筆者認為，最少喺曼徹斯特打吡一戰當中，呢個係一個戰略上嘅需要。呢到講個「上駟對下駟」嘅故仔先，戰國時嘅軍事家孫臏有一段時間係服務齊國公子田忌嘅。有一次田忌同啲達官貴人賽馬，佢唔想輸錢於是問孫臏有無計仔。於是孫臏就叫佢用自己啲靚馬對人哋嘅中班馬，以自己嘅中班馬對人哋嘅下等馬，最後就以最弱嘅馬對對方嘅上等馬。最後兩勝一敗，田忌就唔駛輸喇。無啦啦講咩戰國故事？你睇睇昨晚曼聯個陣，無普巴、無伊巴，點睇都係「中駟」；曼城齊章，個陣點睇都係「上駟」。以「中駟對上駟」，點睇勝算都係低，點先可以喺呢個情況之下取得最大優勢？與其以殘陣出擊、一個唔小心輸3分，不如守到最後拎1分，點都係賺咗。要知道呢場打比唔單止人腳唔齊，仲要身在曼城主場，要強勢、要全攻型，好大可能自取其辱。而更重要嘅係，今季曼聯防守力強已經唔係秘密，將對方拉去對自己有利嘅戰線，呢個先係正確嘅策略計算。而摩帥亦真係做得好鬼徹底，曼城最終喺前場半場交出117傳送，反之曼聯只有7腳，但一面倒嘅形勢之下曼聯真係好成功得一分。「中駟對上駟」唔駛輸，當有錢落袋架喇！

再睇遠啲，曼聯要爭前四前面仲有2坐大山，分別係阿仙奴同埋熱刺，分別係5月7、5月14號2日打；而且仲有幾場不一定穩勝嘅聯賽賽事，仲有變數。對比聯賽，歐霸戰線曼聯除咗對切爾達之外，就只要面對里昂或者係阿積士嘅勝方；再加上歐霸戰線攝喺聯賽最硬2戰嘅中間，喺5月5日、5月12日打，人腳唔夠、又要球員表現得好，犧牲部分比賽半力出擊係在所難免。4場歐霸出盡力可得歐聯資格加個盃，仲要4強比賽當中因為有2回合打，有少少容錯空間；反而聯賽5戰又硬又難食，仲要分分必爭，最好場場贏唔輸得。咁計法，留哂力防守、唔好增加傷病人員，以求歐霸一擊即中，可能已經成為曼聯陣中嘅共識。所以話，呢一分？筆者認為真係夠架喇。