曼聯專區小評：可以代替法卡奧的5位球員 精選

如果，如果啦吓，曼聯真係唔要法卡奧，只係得返無咩態嘅雲佩斯同未夠火候嘅占士威爾遜，曼聯嘅前線真係唔多夠力...俾雲高爾揀，佢會揀邊個攻擊球員入隊呢？以下呢5位，睇嚟係機會比較大嘅！

第一位，當然要搵下雲帥的愛將啦！而入面最接近嘅，應該係湯瑪士梅拿喇！計攻擊模式，佢絕對唔係一位正前鋒，不過論威脅，佢一定唔會弱得過法卡奧！最重要嘅係雲帥同佢情同父子，呢個小朋友之所以打得起，正正因為雲帥的提攜，而佢自己亦多次講過自己同雲帥的特別關係。要搵人救急？唔搵囝囝搵邊個呢？靚仔，過來啦！

另一位，可能係皇馬的巴利。大家對佢獨食唔交波，搞到c朗嬲嬲豬的一幕應該唔會陌生，而總係好似徘徊於合格與唔合格的水準之間，無論係皇馬更衣室定係球會、球迷，對佢嘅表現都已經有啲微言，巴利離隊？唔係無可能。而佢嘅高速同腳法都係非常強大的武器，最重要的，係佢嚟到的話雲帥就可以有新陣用：左猴王、右天使的兩翼齊飛既合曼聯的傳統打法，亦會發揮出兩大翼鋒最強一面。咁嘅話，打單箭頭都夠力啦！(雖然雲帥喜歡雙箭頭)你又心心
我又心心咁就不如一齊踢啦！

巴勒莫21年歲新星，阿根廷小將保羅戴巴拿（Paulo Dybala）有新阿古路之稱，於意甲17次上陣攻入9球，潛質實力都唔錯架！不過要買喇wor...都要成3000萬鎊，對於一位後生仔投資咁大，睇嚟真係要好好望望先。
佢都幾靚仔，可以同靴里拉一齊組成青靚白淨組合！
如果唔駛望，就可以諗下熱刺的哈利卡尼。呢位新季度新星可以話係熱刺的大發現，之前有統計話佢已經同未離隊前的巴利有差唔多的貢獻！27次上陣攻入17球，數字上真係幾唔錯，不過礙於大家係英超敵手之一，而且佢嘅潛力尚係未知之數，熱刺放人機會真係唔大...

不過要同法卡奧爭一日之長短，當然要數卡雲尼。佢同拿維斯早前「陣前走佬」，訓練營都唔去就知離心好重，無計啦，有伊巴謙在陣，邊有得發揮呢？雖然阿仙奴對簽入卡雲尼都係虎視耽耽，不過佢陣中都有基奧特、山齊士、韋碧克、禾確特等等前鋒，比起曼聯的人丁單薄，點睇都係呢邊易啲有正選...會唔會法卡奧之後係卡雲尼？呢個又要拭目以待喇！
點解...點解唔要我...